കായംകുളം : എസ്എഫ്ഐ നേതാവ് നിഖില് തോമസിന് വ്യാജ ഡിഗ്രി സര്ട്ടിഫിക്കറ്റ് നിര്മിച്ചു നല്കിയ ആള്ക്കായി പോലീസ് തെരച്ചിലില് പാലാരിവട്ടത്തെ ഓറിയോണ് എന്ന ഏജന്സിയുടെ ഉടമ തിരുവനന്തപുരം സ്വദേശി സജു എസ്. ശശിധരന് വേണ്ടി തെരച്ചിലിലാണ്.
മാള്ട്ടയില് ജോലിക്കായി വിസ വാഗ്ദാനം ചെയ്ത് പലരില് നിന്നായി പണം തട്ടിയെടുത്ത കേസില് കഴിഞ്ഞ സെപ്റ്റംബറില് ഇയാള് പോലീസിന്റെ പിടിയിലായിരുന്നു. തട്ടിപ്പിനിരയായ അങ്കമാലി സ്വദേശിയുടെ പരാതിയിലായിരുന്നു അറസ്റ്റ്. ജാമ്യത്തില് ഇറങ്ങിയ ഇയാള് നിവലില് ഒൡവിലാണ്. എട്ട് പേരില് നിന്ന് വിസക്കായി പണം വാങ്ങി കബളിപ്പിച്ചെന്ന കേസില് എറണാകുളം നോര്ത്ത് പോലീസിലും ഇയാള്ക്കെതിരെ കേസുണ്ട്.
സജുവിനെ പിടികൂടാന് കഴിഞ്ഞാല് കേസില് നിര്ണായക വിവരങ്ങള് ലഭിക്കുമെന്നാണ് അന്വേഷണ സംഘത്തിന്റെ വിലയിരുത്തല്. കേസിലെ രണ്ടാംപ്രതി അബിന് സി രാജ് ഈ സ്വകാര്യ ഏജന്സിയില് നിന്നാണ് നിഖിലിനായി സര്ട്ടിഫിക്കറ്റ് നിര്മിച്ച നല്കിയത്. ഇത്തരത്തില് മുമ്പും വ്യാജ സര്ട്ടിഫിക്കറ്റുകള് നിര്മിച്ച് നല്കിയിരുന്നോയെന്ന് പോലീസ് അന്വേഷണം നടത്തി വരികയാണ്.
അതേസമയം ഒന്നാം പ്രതി തോമസ് നിഖില് അന്വേഷണവുമായി സഹകരിക്കുന്നില്ലെന്ന് പോലീസ് പറഞ്ഞു. പല കാര്യങ്ങളും ഇയാള് മറച്ചുവെക്കുന്നുണ്ടെന്നാണ് സംശയം. അബിന് സി. രാജിന്റെ ഫോണും പൊലീസിന് പരിശോധിക്കാന് സാധിച്ചിട്ടില്ല. പഴയ ഫോണ് നശിച്ചു പോയെന്നും ഒന്നര മാസം മുന്പ് വാങ്ങിയ ഫോണാണ് നിലവില് അബിന്റെ കയ്യിലുള്ളത്. എന്നാല് മാലിയിലെ അബിന്റെ വസതിയില് നിന്ന് ലാപ്ടോപ്പും പഴയ ഫോണും കണ്ടെത്തി പരിശോധിക്കാനും പോലീസ് നീക്കം നടത്തുന്നുണ്ട്.
