തിരുവനന്തപുരം: കേരളത്തില് വിദേശമദ്യം നിര്മ്മിച്ച് കയറ്റി അയയ്ക്കാനുള്പ്പെടെ മദ്യത്തിന്റെ ഉത്പാദനം വര്ധിപ്പിക്കാനുള്ള നിര്ദേശങ്ങളുമായി മദ്യനയം ഒരുങ്ങുന്നു. മുഖ്യമന്ത്രി വിദേശ സന്ദര്ശനം കഴിഞ്ഞ് തിരികെയെത്തിയാല് പുതിയ നയത്തിന് മന്ത്രിസഭാ യോഗം അംഗീകാരം നല്കും. സംസ്ഥാനത്ത് സ്പിരിറ്റ് ഉത്പാദനം പ്രോത്സാഹിപ്പിക്കാനുള്ള നിര്ദേശങ്ങളാണ് പുതിയ മദ്യനയത്തിലുള്ളത്.
സ്പിരിറ്റ് ഉത്പാദനം പ്രോത്സാഹിപ്പിക്കാനും അതുവഴി തൊഴില് അവസരങ്ങളുണ്ടാക്കാനുമാണ് മദ്യനയത്തിലെ നിര്ദേശം. കേരളത്തില് ഉത്പാദിപ്പിക്കുന്ന ഇന്ത്യന് നിര്മ്മിത വിദേശ മദ്യം മറ്റ് സംസ്ഥാനങ്ങളിലേക്കും വിദേശത്തേക്കും കയറ്റുമതി ചെയ്യണം. ഇതുവഴി നികുതി വരുമാനം വര്ധിപ്പിക്കാം. നിലവില് ചില ബ്രാന്ഡുകള് മാത്രമാണ് കയറ്റി അയയ്ക്കുന്നത്. അതിന് മാറ്റംവരുത്തി കയറ്റുമതി പ്രോത്സാഹിപ്പിക്കണം. അതിനായി കൂടുതല് ഡിസ്റ്റലറികള്ക്ക് അനുമതി നല്കണം. ഒന്നാം പിണറായി സര്ക്കാരിന്റെ കാലത്ത് ബ്രൂവറിയും ഡിസ്റ്റലറികളും അനുവദിച്ചത് വിവാദമായതോടെ പിന്വലിച്ചിരുന്നു. മദ്യ ഉത്പാദനവും കയറ്റുമതിയും പ്രോത്സാഹിപ്പിക്കാനുള്ള നിര്ദേശം കൂടുതല് ബ്രൂവറികളെയും ഡിസ്റ്റലറികളെയും ലക്ഷ്യം വച്ചാണെന്ന് ആരോപണം ഉയര്ന്നിട്ടുണ്ട്.
ഷാപ്പുകള്ക്ക് നിലവാരമനുസരിച്ച് നക്ഷത്ര പദവി നല്കും. ഷാപ്പുകളെല്ലാം ആധുനികവത്ക്കരിക്കും. ടൂറിസവുമായി സഹരിച്ച് പുതിയ പദ്ധതികള് തയാറാക്കും. ഒരു ജില്ലയില് നിന്നും മറ്റൊരു ജില്ലയിലേക്ക് കള്ള് കൊണ്ടുപോകുന്ന വാഹനങ്ങളില് ജിപിഎസ് ഘടിപ്പിച്ച് നിരീക്ഷിക്കും. വ്യാജ കള്ള് തടയാനാണിത്.
പഴങ്ങളില് നിന്ന് കര്ഷക സംഘങ്ങള് ഉത്പാദിപ്പിക്കുന്ന വീഞ്ഞ് ബെവ്കോ വഴി വില്ക്കും. ബാര് ലൈസന്സ് ഫീസ് വര്ധിപ്പിക്കും. വിദ്യാഭ്യാസ സ്ഥാപനങ്ങളിലും വാര്ഡ് തലത്തിലുമായി ജാഗ്രത സമിതികളുടെ പ്രവര്ത്തനം സ്ഥിരമായി സോഷ്യല് ഓഡിറ്റ് നടത്തും. സ്ഥിരം ലഹിരക്കടത്തുകാരെ കരുതല് തടങ്കലില് വയ്ക്കാനുള്ള നടപടികള് വര്ധിപ്പിക്കും. അതേസമയം സ്കൂളുകള്ക്ക് സമീപം പ്രവര്ത്തിക്കുന്ന ഷാപ്പുകളുടെയും ബാറുകളുടെയും ദൂരപരിധി കുറയ്ക്കാനുള്ള നിര്ദേശവുമുണ്ടെന്നാണ് സൂചന.
