ബംഗളുരു: പ്രധാനമന്ത്രിയുടെ രണ്ട് ദിവസത്തെ കർണ്ണാടക സന്ദർശനം നിയമസഭ തെരഞ്ഞെടുപ്പിൽ ബിജെപിക്ക് മുതൽക്കൂട്ടാകുമെന്ന്‌ കേന്ദ്ര ഇലക്ട്രോണിക്സ്, ഐടി വകുപ്പ് സഹമന്ത്രി രാജീവ് ചന്ദ്രശേഖർ അഭിപ്രായപ്പെട്ടു.
കോൺഗ്രസ് പാർട്ടി 65 വർഷമായി തുടർന്നിരുന്ന അഴിമതി നിറഞ്ഞ ദുർഭരണം തുടച്ച് നീക്കുന്നതിന് പ്രധാനമന്ത്രിയുടെ സന്ദർശനം ഒരു നിമിത്തമാകും. തന്റെ പ്രസംഗങ്ങളിൽ നരേന്ദ്ര മോദി ആവർത്തിച്ച് പറഞ്ഞ വാക്കുകൾ പ്രധാനമന്ത്രിയെന്ന നിലയിൽ നരേന്ദ്രമോദിയിൽ പൊതുജനങ്ങളുടെ വിശ്വാസം ഒന്നുകൂടി ഊട്ടിയുറപ്പിക്കുന്നതിന് ഇടയാക്കുമെന്ന് ബംഗളുരുവിൽ നിന്നുള്ള രാജ്യസഭാംഗം കൂടിയായ രാജീവ് ചന്ദ്രശേഖർ പറഞ്ഞു.
അതിനൂതന സാങ്കേതികവിദ്യകളുടെ ആഗോള കേന്ദ്രമെന്ന നിലയിൽ ബെംഗളൂരുവിന്റെ സ്ഥാനം ലോക ഭൂപടത്തിൽ ആവർത്തിച്ചുറപ്പിക്കു’മെന്ന പ്രധാനമന്ത്രിയുടെ വാക്കുകൾ പാർട്ടി പ്രവർത്തകരിലും കർണ്ണാടകത്തിലെ വോട്ടർമാരിലും എന്തെന്നില്ലാത്ത ആത്മവിശ്വാസമാണുളവാക്കിയിരിക്കുന്നത്. പ്രധാനമന്ത്രിയുടെ ആഹ്വാനം പാർട്ടി പ്രവർത്തകരും വോട്ടർമാരും ഉൾക്കൊണ്ടു കഴിഞ്ഞിരിക്കുന്നു. അത് ബിജെപി നയിക്കുന്ന കർണ്ണാടക സർക്കാരിനെ തുടർ ഭരണത്തിലേക്ക് നയിക്കും, രാജീവ് ചന്ദ്രശേഖർ അഭിപ്രായപ്പെട്ടു.
കർണാടകയിൽ ഒരു പ്രകടന പത്രികയും തങ്ങൾ നടപ്പിലാക്കാൻ പോകുന്നില്ലെന്ന് കോൺഗ്രസിന് നന്നായി അറിയാം, അതിനാൽത്തന്നെ ഒരിക്കലും പാലിക്കപ്പെടാത്ത പ്രീണനവും ധാരാളം വാഗ്ദാനങ്ങളും അവരുടെ പ്രകടനപത്രികയിൽ കാണാൻ കഴിയും. അതെ സമയം പ്രകടനപത്രികയ്‌ക്ക് പുറത്ത് പ്രധാനമന്ത്രിയെ അധിക്ഷേപിക്കുന്ന പഴയ രാഷ്‌ട്രീയം തന്നെ അവർ തുടരുകയാണ്. കർണാടകത്തിലെ യാഥാർഥ്യബോധമുള്ള ജനങ്ങൾ ഇത് തിരിച്ചറിയുന്നുണ്ട്. അതിന്റെ പ്രതിഫലനം തെരഞ്ഞെടുപ്പിലുണ്ടാകും.രാജീവ് ചന്ദ്രശേഖർ പറഞ്ഞു.
പ്രധാനമന്ത്രിയുടെ രണ്ടാം ദിന സന്ദർശനത്തിന്റെ ഭാഗമായി കെംപഗൗഡ പ്രതിമ മുതൽ ട്രിനിറ്റി സർക്കിൾ വരെ നടത്തിയ റോഡ് ഷോയിൽ ഉടനീളം രാജീവ് ചന്ദ്രശേഖറും പ്രധാനമന്ത്രിയെ അനുഗമിക്കുകയുണ്ടായി.
പ്രതികരിക്കാൻ ഇവിടെ എഴുതുക: