കൊല്ലം: ആശുപത്രിയില് മദ്യപിച്ചെത്തി അതിക്രമം കാട്ടിയ ടെലിവിഷന് കോമഡി ഷോ താരം അറസ്റ്റില്. ടെലിവിഷന് കോമഡി ഷോകളിലൂടെ ശ്രദ്ധേയനായ മധു അഞ്ചലാണ് പോലീസിന്റെ പിടിയിലായത്. അഞ്ചല് ചന്തമുക്കിലെ സ്വകാര്യ ആശുപത്രിയില് നടന്ന സംഭവത്തില് മദ്യപിച്ചെത്തിയ മധു രോഗികളിരിക്കുന്ന കസേരയില് കയറി കിടക്കുകയായിരുന്നു. ഇത് ആളുകള് ചോദ്യം ചെയ്തതോടെയാണ് പ്രശ്നങ്ങള് ആരംഭിച്ചത്.
ആശുപത്രിയിലുണ്ടായിരുന്ന രോഗികളെയും ജീവനക്കാരെയും ഇയാള് അസഭ്യം പറഞ്ഞു. ഇതോടെ മധുവിനെ പുറത്താക്കാന് ജീവനക്കാര് ശ്രമിച്ചു. തുടര്ന്ന്, ഇയാള് ആശുപത്രിയില് അതിക്രമം നടത്തുകയായിരുന്നു. പ്രശ്നം രൂക്ഷമായതിനെ തുടര്ന്ന്, ആശുപത്രി അധികൃതര് പോലീസിനെ വിവരം അറിയിച്ചു. സ്ഥലത്തെത്തിയ പോലീസ് മധുവിനെ അനുനയിപ്പിക്കാന് ശ്രമിച്ചെങ്കിലും നടന്നില്ല. തുടര്ന്ന്, പോലീസ് ഇയാളെ ബലപ്രയോഗത്തിലൂടെ കീഴ്പ്പെടുത്തി സ്റ്റേഷനില് എത്തിക്കുകയായിരുന്നു. ആശുപത്രിയില് മദ്യപിച്ച് ബഹളമുണ്ടാക്കിയതിന് ഇയാള്ക്കെതിരെ പോലീസ് കേസെടുത്തു. സ്റ്റേഷനില് നിന്ന് മാതാവിനൊപ്പം മധുവിനെ പോലീസ് ജാമ്യത്തില് വിട്ടു.
