തിരുവനന്തപുരം: വെള്ളനാട് സ്വകാര്യ വ്യക്തിയുടെ കിണറ്റില്‍ വീണ കരടി ചത്തു. വെള്ളത്തില്‍ വീണ കരടിയെ മണിക്കൂറുകള്‍ക്ക് ശേഷമാണ് പുറത്തെത്തിക്കാനായത്. ഉദ്വേഗം നിറഞ്ഞ മണിക്കൂറുകള്‍ക്ക് ശേഷം കരടിയെ പുറത്തെത്തിച്ച് അടിയന്തിര വൈദ്യസഹായത്തിനായി എത്തിച്ചെങ്കിലും ചത്തു. ബുധനാഴ്ച രാത്രിയോടെയാണ് കരടി കിണറ്റില്‍ വീണത്. തുടര്‍ന്ന് ഇന്ന് രാവിലെ 9.25 മണിയോടെ കരടിയെ മയക്കുവെടിയേറ്റ കരടി സജ്ജീകരിച്ച വലയിലേക്ക് വീഴാതെ അതിനിടയില്‍ കൂടി ആഴമുള്ള കിണറ്റിലേക്ക് മുങ്ങിത്താഴുകയായിരുന്നു. പിന്നീട് മണിക്കൂറുകള്‍ നീണ്ട ശ്രമങ്ങള്‍ക്ക് ശേഷം കരടിയെ വലയിലാക്കി കെട്ടിവലിച്ച് പുറത്തെത്തിക്കുകയായിരുന്നു. കരടിയെ പുറത്തെത്തിച്ചെങ്കിലും അതിന്റെ ആരോഗ്യത്തില്‍ ആശങ്ക ആദ്യമേ തന്നെ നിലനിന്നിരുന്നു.
വെള്ളനാട് സ്വദേശി അരവിന്ദിന്റെ വീട്ടിലെ കിണറ്റിലാണ് വീണത്. കോഴികളെ പിടിക്കാന്‍ വന്ന കരടി, ആളുകളുടെ ശബ്ദം കേട്ട് ഭയന്നോടുന്നതിനിടെ 20 അടി താഴ്ചയുള്ള കിണറ്റില്‍ വീഴുകയായിരുന്നു. കരടിയെ പുറത്തെടുക്കുന്നതില്‍ പാകപ്പിഴ പറ്റിയെന്ന് മയക്കുവെടിവച്ച ഡോക്ടര്‍ ജോക്കബ് അലക്‌സാണ്ടര്‍ പ്രതികരിച്ചു. മയക്കുവെടി വെച്ചത് കൃത്യമായിരുന്നു, എന്നാല്‍ വലയുടെ ഒരു വശത്ത് മുറുക്കും കുറഞ്ഞുവെന്നും ഇതാണ് കരടി വെള്ളത്തില്‍ വീഴാന്‍ കാരണമായതെന്നുമാണ് ഡോ. ജോക്കബ് അലക്‌സാണ്ടര്‍ പറയുന്നത്. സങ്കടകരമായ അവസ്ഥയാണെന്നും ഡോക്ടര്‍ കൂട്ടിച്ചേര്‍ത്തു.
കൂട് പൊളിച്ചാണ് കരടി കോഴികളെ പിടിച്ചത്. തുടര്‍ന്ന് ബഹളം കേട്ടാണ് ആളുകള്‍ ശ്രദ്ധിക്കുന്നത്. ആളുകളുടെ ശബ്ദം കേട്ട് ഭയന്നോടുന്നതിനിടെയാണ് കരടി കിണറ്റില്‍ വീണത്. പ്രദേശത്ത് കരടിയെ കണ്ടതില്‍ ആശങ്കയെന്ന് പ്രദേശവാസികള്‍ പറഞ്ഞു. വല വിരിച്ചതിന് ശേഷം കരടിയെ മയക്കുവെടിവെച്ചെങ്കിലും അത് വലയില്‍ നിന്ന് വഴുതി കിണറ്റിലേക്ക് പോകുകയായിരുന്നു.
