തിരുവനന്തപുരം: ട്രാവല് ട്രേഡ് ഷോ ആയ ഐടിബി ബെര്ലിനില് ശക്തമായ സാന്നിധ്യമറിയിച്ച് കേരള ടൂറിസം.’ദി മാജിക്കല് എവരിഡേ’ എന്ന പ്രമേയത്തില് 7 മുതല് 9 വരെ നടന്ന ട്രേഡ് ഷോയില് 122 ചതുരശ്ര മീറ്ററില് ആയിരുന്നു കേരള പവലിയന്. പവലിയന്റെ കവാടത്തില് ഒരുക്കിയ കൂറ്റന് കെട്ടുകാളകള് മുഖ്യ ആകര്ഷണമായി. കേരള ടൂറിസം പ്രിന്സിപ്പല് സെക്രട്ടറി കെ.എസ്. ശ്രീനിവാസ്, ടൂറിസം ഡയറക്ടര് പി.ബി. നൂഹ് എന്നിവരുടെ നേതൃത്വത്തിലുള്ള കേരള പ്രതിനിധി സംഘത്തില് 13 കോ എക്സിബിറ്റേഴ്സ് ആണ് പങ്കെടുത്തത്.
161 രാജ്യങ്ങളില് നിന്നുള്ള 5,500 ലധികം എക്സിബിറ്റിങ് കമ്പനികളാണ് ട്രേഡ് ഷോയില് പങ്കെടുത്തത്. ആഗോള ടൂറിസം മേഖലയിലെ ഭാവി യാത്രാ പദ്ധതികള് രൂപപ്പെടുത്തുന്ന ഐടിബി ബെര്ലിനില് യാത്രാ സമൂഹത്തിന്റെ മുന്ഗണനകളും ആവശ്യങ്ങളും പുതിയ പ്രവണതകളും പ്രദര്ശിപ്പിച്ചു.
