ഒരു കഥാപാത്രം മാത്രമുള്ള, പത്ത് ടെക്നീഷ്യന്മാര് മാത്രം വര്ക്ക് ചെയ്ത, പത്തു ദിവസം മാത്രം ഷൂട്ട് ചെയ്ത് പൂര്ത്തിയായ ’18 പ്ലസ്’ എന്ന ചിത്രത്തിലെ വീഡിയോ ഗാനം, പ്രശസ്ത ചലച്ചിത്ര പ്രവര്ത്തകരുടെ ഫേസ്ബുക്ക് പേജിലൂടെ റിലീസ് ചെയ്തു.
ഭാവന സത്യകുമാര് എഴുതിയ വരികള്ക്ക് സഞ്ജയ് പ്രസന്നന് സംഗീതം പകര്ന്ന് സിതാര കൃഷ്ണകുമാര് ആലപിച്ച ‘മിഴിയില് നിറയും… എന്നാരംഭിക്കുന്ന ഗാനമാണ് റിലീസായത്. വി ലൈവ് സിനിമാസിന്റേയും ഡ്രീം ബിഗ് അമിഗോസിന്റെയും ബാനറില് എകെവി ജുബാലിനെ നായകനാക്കി മിഥുന് ജ്യോതി സംവിധാനം ചെയ്യുന്ന ത്രില്ലര് ഡ്രാമ ചിത്രമാണിത്. പൂര്ണമായും ഒരേ ഒരു നടനെ വെച്ച് ചിത്രീകരിക്കുന്ന സിനിമയാണ് എന്നതാണ് ’18+’ന്റെ പ്രത്യേകത. പരീക്ഷണ സിനിമയായി ഒരുങ്ങുന്ന ’18+’ ഉടന് പ്രദര്ശനത്തിനെത്തും.
മലയാളത്തിന് ഒപ്പം തമിഴിലും ചിത്രം നിര്മ്മിക്കുന്നുണ്ട്. ഒരാള് മാത്രമുള്ള ചിത്രം എന്നതിന് പുറമെ ചിത്രത്തിന്റെ അണിയറയില് പ്രവര്ത്തിക്കുന്നവരെല്ലാം തന്നെ പ്രായം കുറഞ്ഞവരാണെന്ന പ്രത്യേകതയും ഉണ്ട്. ഛായാഗ്രഹണം- ദേവന് മോഹന്, എഡിറ്റിംഗ്- അര്ജുന് സുരേഷ്, സംഗീതം- സഞ്ജയ് പ്രസന്നന്, ഗാനരചന- ഭാവന സത്യകുമാര്, ആര്ട്ട്- അരുണ് മോഹന്, സ്റ്റില്സ്- രാഗൂട്ടി, പരസ്യകല- നിഥിന്, പ്രൊഡക്ഷന് കണ്സള്ട്ടന്റ്- ഹരി വെഞ്ഞാറമൂട്, പിആര്ഒ- എ.എസ്. ദിനേശ്.
