തിരുവനന്തപുരം: തന്റെ പുതിയ ചിത്രത്തിന്റെ പോസ്റ്റര് ഫേസ്ബുക്കില് ഷെയര് ചെയ്തതിന്റെ പേരില് സിപിഎം പിബി അംഗം എം.എ.ബേബി നേരിടുന്ന സൈബര് ആക്രമണത്തില് പ്രതികരണവുമായി നടന് പരീഷ് പേരാടി. നമുക്ക് അതിരാവിലെ എഴുന്നേറ്റ് ബിബിസിയുടെ ഡോക്യൂമെന്ററി പ്രദര്ശിപ്പിക്കാനുള്ള സ്ഥലം നോക്കാമെന്നും ആവിഷ്ക്കാര സ്വാതന്ത്ര്യം പൂത്തോ എന്നും സഹിഷ്ണുത പൂവിട്ടോ എന്നും നോക്കാമെന്നും ഹരീഷ് ഫേസ്ബുക്കില് കുറിച്ചു. അവിടെ വെച്ച് ഞങ്ങള് നിങ്ങള്ക്ക് മാനവികത വിളമ്പും, അതും തിന്ന് ഒരക്ഷരം മിണ്ടാതെ ഏമ്പക്കം വിട്ട് സ്തുതി പാട്ടും പാടി പോയ്ക്കോണം അതല്ലാതെ വെറെ എവിടെയെങ്കിലും ആവിഷ്ക്കാര സ്വാതന്ത്ര്യവും സൗഹ്യദവും മാനവികതയും ഉണ്ടെന്ന് ആരെങ്കിലും പറഞ്ഞാല് അത് ഏത് വലിയ നേതാവാണെങ്കിലും ഞങ്ങള് തറവാടികളായ കമ്മ്യൂണിസ്റ്റ് കുലമാടമ്പികളാകും, ഉത്തരകൊറിയിസം നീണാള് വാഴട്ടെയെന്നും ഹരീഷ് ഫേസ്ബുക്കില് കുറിച്ചു.
അതേസമയം, സൈബര് ആക്രമണം രൂക്ഷമായതോടെ ബേബി തന്നെ ഹരീഷിന്റെ സിനിമ പോസ്റ്റര് ഷെയര് ചെയ്തതിന്റെ വിശദീകരണവുമായി രംഗഗത്തെത്തി.
പോസ്റ്റിന്റെ പൂര്ണരൂപം-
‘ദാസേട്ടന്റെ സൈക്കിള്’ എന്ന മലയാളസിനിമയുടെ പോസ്റ്റര് അതിന്റെ നിര്മ്മാതാവിന്റെ അഭ്യര്ത്ഥനപ്രകാരം ഞാനെന്റെ ഫേസ്ബുക്കില് പങ്കുവക്കുകയുണ്ടായി. ‘ഇടതുപക്ഷവിരുദ്ധന്റെ’ സിനിമക്ക് ഞാനെന്തിനുപ്രചാരണം നല്കുന്നു എന്നചോദ്യം സാമൂഹ്യമാദ്ധ്യമങ്ങളില് പലരും ഉയര്ത്തിയത് എനിക്ക് ചിലസുഹൃത്തുക്കള് അയച്ചുതരികയുണ്ടായി.
ജയപ്രകാശ് കുളൂരിന്റെ ‘അപ്പുണ്ണികളുടെ റേഡിയോ’ എന്ന ഒരു നാടകമാണ് അപ്പുണ്ണി ശശി,
ഹരീഷ് പേരടി എന്നീ നടന്മാരുമായി എനിക്കുള്ള സൗഹൃദം ഉറപ്പിച്ചത്.
അതിപ്രഗല്ഭരായ ആരണ്ടുനടന്മാരും പുതിയ ഉയരങ്ങള് കീഴടക്കുന്നുവെന്ന് കേള്ക്കാനല്ലാതെ അവരുടെ ചലച്ചിത്രജീവിതം സിനിമകണ്ട് വിലയിരുത്താന് എനിക്ക് അവസരം കിട്ടിയില്ല. അങ്ങനെയിരിക്കുമ്പോഴാണ് കഴിഞ്ഞ ദിവസം ഹരീഷിന്റെ അഭ്യര്ത്ഥന: ചലച്ചിത്രനിര്മ്മാതാവായി തന്റെ ആദ്യസംരഭത്തിന്റ പോസ്റ്റര് ഒന്നു റിലീസ് ചെയ്യണം. 12 ന് ആന്ധ്രയിലെ വിജയവാഡയിലാണെന്നുപറഞ്ഞപ്പോള് പ്രശ്നമില്ല; ഫേസ് ബുക്കില്മതി എന്നറിയിച്ചു.
ഇതാണ് സംഭവിച്ചത്. എനിക്കും എന്റെ പാര്ട്ടിക്കും യോജിക്കാന്കഴിയാത്തകാര്യങ്ങള് ഹരീഷ് പറഞ്ഞിട്ടുണ്ടെങ്കില് ; അദ്ദേഹം നിര്മ്മിക്കുന്ന സിനിമയുടെ പോസ്റ്റര് എന്റെ ഫേസ്ബുക്കില്വന്നതോടെ, അത്തരം നിലപാടുകള്ക്ക് ഞാന് അംഗീകാരം കൊടുത്തു എന്ന് വ്യാഖ്യാനിക്കേണ്ടതില്ല. സങ്കുചിതമായ കക്ഷിരാഷ്ട്രീയ പരിഗണനകള്ക്ക് അതീതമായി കലാസാഹിത്യമേഖലകളില് വിമര്ശനപരമായസഹകരണം വിശാലാടിസ്ഥാനത്തില് സാദ്ധ്യമാവണം എന്നതാണ് കാലഘട്ടം ആവശ്യപ്പെടുന്ന നിലപാട്.
