ദമാസ്കസ് : ഭൂകമ്പാവശിഷ്ടങ്ങള്ക്കിടയില് തന്റെ കുഞ്ഞനുജനെ സുരക്ഷിതമായി ചേര്ത്തു പിടിച്ച് രക്ഷിച്ച ഏഴ് വയസ്സുകാരിയെ അഭിനന്ദിച്ച് ഡബ്യൂഎച്ച്ഒ മേധാവി. ധീരയായ ഈ പെണ്കുട്ടിയെന്ന് അഭിസംബോധന ചെയ്തുകൊണ്ട് ടഡ്രോസ് അഥാനോം ഗെബ്രിയേസസ് കുട്ടിയുടെ വീഡിയോയും തന്റെ ട്വിറ്റര് പേജില് പങ്കുവെച്ചിട്ടുണ്ട്.
‘ധീരയായ ഈ പെണ്കുട്ടിയോട് ആരാധന തോന്നുന്നു’, ഗെബ്രിയേസസിന്റെ ട്വീറ്റ്. ഐക്യരാഷ്ട്രസഭയുടെ പ്രതിനിധി മുഹമ്മദ് സഫയും ഇരുവരുടെയും വീഡിയോ പങ്കുവച്ചിരുന്നു. ’17 മണിക്കൂറുകളോളം അവള് അങ്ങനെ കൈവെച്ച് ആ കെട്ടിടാവിശിഷ്ടങ്ങള്ക്കിടയില് കിടന്നു. ഇതാരും പങ്കുവയ്ക്കുന്നില്ല. ഈ കുട്ടികള് മരിച്ചിരുന്നെങ്കില് എല്ലാവരും പങ്കുവച്ചേനെ’, രോഷത്തോടെ മുഹമ്മദ് സഫ ട്വിറ്ററിലെഴുതിയ കുറിപ്പില് പറയുന്നു.
തുര്ക്കി- സിറിയ അതിര്ത്തിയില് ഭൂകമ്പം വിതച്ച നാശനഷ്ടത്തില് മരിച്ചവരുടെ എണ്ണം 16,000 കടന്നതായാണ് ഏജന്സി റിപ്പോര്ട്ട് ചെയ്യുന്നത്. തുടര് ചലനങ്ങളും കാലവസ്ഥയും പ്രതിസന്ധി സൃഷ്ടിക്കുന്നുണ്ടെങ്കിലും രക്ഷാ പ്രവര്ത്തനങ്ങള് കാര്യക്ഷമമായി നടന്നു വരികയാണ്. ഇന്ത്യന് ദൗത്യ സംഘവും രക്ഷാ പ്രവര്ത്തനങ്ങള് നടത്തി വരികയാണ്.
