തിരുവനന്തപുരം: ചാര്ട്ടേഡ് വിമാനങ്ങളുടെ ചെലവ് യുക്തിസഹമാക്കാനും അതുവഴി യാത്രക്കാര്ക്ക് താങ്ങാവുന്ന പരിധിക്കുള്ളില് ടിക്കറ്റ് നിരക്ക് നിലനിര്ത്താനും പ്രാഥമികമായി 15 കോടി രൂപയുടെ കോര്പസ് ഫണ്ട് രൂപീകരിക്കുമെന്ന് ധനമന്ത്രി കെ എന് ബാലഗോപാല്. ഏതെങ്കിലും പ്രത്യേക വിമാനത്താവളം ഇതില് പങ്കാളിയാകാന് ആഗ്രഹിക്കുന്ന സാഹചര്യത്തില് ഈ ഫണ്ട് ഒരു അണ്ടര് റൈറ്റിങ് ഫണ്ട് ആയി ഉപയോഗിക്കാമെന്നും ബജറ്റ് പ്രസംഗത്തില് മന്ത്രി വ്യക്തമാക്കി.
വിമാനങ്ങള് ചാര്ട്ടര് ചെയ്യാനുള്ള കുറഞ്ഞ ക്വട്ടേഷനുകള് എയര്ലൈന് ഓപ്പറേറ്റര്മാരില് നിന്ന് സുതാര്യമായ പ്രക്രിയയിലൂടെ വാങ്ങുമെന്നും ധനമന്ത്രി വ്യക്തമാക്കി. റബര് സബ്സിഡിക്കുള്ള ബജറ്റ് വിഹിതം 600 കോടിയായി വര്ധിപ്പിക്കുന്നതായും ധനമന്ത്രി വ്യക്തമാക്കി. സംസ്ഥാനത്തെ റബര് കര്ഷകരെ സഹായിക്കുന്നതിന്റെ ഭാഗമായാണ് ബജറ്റ് വിഹിതം വര്ധിപ്പിക്കുന്നതെന്ന് ബജറ്റ് പ്രസംഗത്തില് ധനമന്ത്രി വ്യക്തമാക്കി.
റബര് കൃഷിക്കാര് വലിയ പ്രതിസന്ധി നേരിടുകയാണ്. രാജ്യത്തെ ഏറ്റവും വലിയ പ്ലാന്റേഷന് മേഖല കേരളത്തിലാണെന്നും മന്ത്രി ചൂണ്ടിക്കാട്ടി. ഏറെകാലമായി പ്രതിസന്ധി നേരിടുന്ന പരമ്പരാഗത വ്യവസായങ്ങളെയും തോട്ടവിളകളെയും ആഗോള മാന്ദ്യം പുറക്കോട്ടടിക്കാന് സാധ്യതയുണ്ടെന്നും കൃഷിക്കാരെ സംരക്ഷിക്കേണ്ടതുണ്ടെന്നും മന്ത്രി ബാലഗോപാല് വ്യക്തമാക്കി.
