തിരുവനന്തപുരം: യുവസംവിധായികയെ താമസസ്ഥലത്ത് മരിച്ചനിലയില് കണ്ടെത്തിയ സംഭവം കൊലപാതകമെന്ന് സൂചന. അന്തരിച്ച സംവിധായകന് ലെനിന് രാജേന്ദ്രന്റെ സഹസംവിധായികയായിരുന്ന നയനാ സൂര്യ (28)യുടെ മരണമാണ് മൂന്നുവര്ഷത്തിനുശേഷം വിവാദമാകുന്നത്. കഴുത്തുഞെരിഞ്ഞാണ് മരണം എന്നാണ് പോസ്റ്റ്മോര്ട്ടം റിപ്പോര്ട്ടിലെ സൂചനയെന്ന് മാതൃഭൂമി ദിനപത്രം റിപ്പോര്ട്ട് ചെയ്തു. ഇത് കൊലപാകമെന്ന സംശയം ബലപ്പെടുത്തുന്നതായാണ് മുന് പോലീസ് ഉദ്യോഗസ്ഥര് നല്കുന്ന സൂചന. അതേസമയം പോലീസ് നടത്തിയ മൃതദേഹപരിശോധനയില് കഴുത്തിലുണ്ടായിരുന്ന 31.5 സെ.മീ മുറിവും മറ്റു ക്ഷതങ്ങളും രേഖപ്പെടുത്തിയിട്ടില്ല. അന്വേഷണം എങ്ങുമെത്താതായതോടെ സംവിധായികയുടെ സുഹൃത്തുക്കള് പരാതിയുമായി രംഗത്തെത്തിയതോടെയാണ് വിവരങ്ങള് പുറത്തുവന്നത്. അടിവയറ്റില് മര്ദനമേറ്റതായി പോസ്റ്റ്മോര്ട്ടം റിപ്പോര്ട്ടിലുണ്ടായിട്ടും പോലീസ് അന്വേഷിക്കുകപോലും ചെയ്യാതെ കേസ് അവസാനിപ്പിക്കാനാണ് ശ്രമിക്കുന്നതെന്നാണ് പരാതി.
2019 ഫെബ്രുവരി 24 നാണ് കൊല്ലം അഴീക്കല് സൂര്യന്പുരയിടത്തില് ദിനേശന്റെയും ഷീലയുടെയും മകള് നയനാസൂര്യയെ തിരുവനന്തപുരം ആല്ത്തറ നഗറിലെ വാടകവീട്ടില് മരിച്ചനിലയില് കണ്ടെത്തിയത്. പത്തുവര്ഷത്തോളമായി സംവിധായകന് ലെനിന് രാജേന്ദ്രന്റെ സഹസംവിധായികയായിരുന്നു നയന. ആലപ്പാട് കരിമണല് ഖനനത്തിനെതിരേ നടന്ന പ്രക്ഷോഭങ്ങളുടെ മുന്നിരയില് നയനയുണ്ടായിരുന്നു. ലെനിന് രാജേന്ദ്രന്റെ മരണം നടന്ന് ഒരുമാസം കഴിഞ്ഞപ്പോഴായിരുന്നു നയനയുടെ മരണം. വിഷാദരോഗത്തിന് ചികിത്സതേടിയിരുന്ന നയന ആത്മഹത്യചെയ്തതാവാം എന്ന മട്ടിലാണ് വാര്ത്തകള് പ്രചരിച്ചത്. പ്രമേഹരോഗിയായിരുന്ന നയന ഷുഗര്താഴ്ന്ന അവസ്ഥയില് മുറിക്കുള്ളില് കുഴഞ്ഞുവീണ് പരസഹായംകിട്ടാതെ മരിക്കുകയായിരുന്നു എന്നാണ് അന്ന് പോലീസ് നല്കി ഔദ്യോഗിക വിശദീകരണം.
