തിരുവനന്തപുരം : പരിസ്ഥിതി ലോല പ്രദേശങ്ങളിലെ സീറോ ബഫര്സോണ് റിപ്പോര്ട്ടും ഭൂപടവും പുറത്തുവിട്ട് സംസ്ഥാന സര്ക്കാര്. 2021ല് കേന്ദ്രത്തിന് സംസ്ഥാനം നല്കിയ റിപ്പോര്ട്ട് ആണ് പ്രസിദ്ധീകരിച്ചത്. ബുധനാഴ്ച അര്ധരാത്രിയോടെയാണ് റിപ്പോര്ട്ട് പുറത്തുവിട്ടത്.
സര്ക്കാര് വെബ് സൈറ്റുകളലും പഞ്ചായത്ത്, സര്ക്കാര് ഓഫീസുകളിലും റിപ്പോര്ട്ട് ലഭ്യമാണ്. ജനങ്ങള്ക്ക് എന്തെങ്കിലും പരാതിയുണ്ടെങ്കില് ഈ റിപ്പോര്ട്ട് മാനദണ്ഡമാക്കി വേണം നല്കാന്. ജനവാസ മേഖലകളെ ബഫര് സോണില് നിന്നും ഒഴിവാക്കിയാണ് റിപ്പോര്ട്ട് തയാറാക്കിയത്. പരാതികള് ഫീല്ഡ് വെരിഫിക്കേഷനിലൂടെ പരിഹരിച്ച് റിപ്പോര്ട്ട് തയ്യാറാക്കി നല്കുമെന്നാണ് സര്ക്കാര് അറിയിച്ചിരിക്കുന്നത്. 22 സംരക്ഷിത വന മേഖലക്ക് ചുറ്റും ഉള്ള ഭൂപടം ആണിത്.
ഭൂപടത്തില് താമസ സ്ഥലം വയലറ്റ് നിറത്തില് ആണ് രേഖപ്പെടുത്തിയിട്ടുള്ളത്. പരിസ്ഥിതിലോല മേഖലക്ക് പിങ്ക് നിറം. വിദ്യാഭ്യാസ സ്ഥാപനങ്ങള് നീല നിറവും നല്കിയിട്ടുണ്ട്. സുല്ത്താന് ബത്തേരി നഗരസഭയുടെ ഭൂരിഭാഗവും ബഫര് മേഖലയില് ആണ്. വയനാട് കോഴിക്കോട് ജില്ലകളിലെ 7 പഞ്ചായത്തുകള് ബഫര് സോണില് ഉള്പ്പെട്ടിട്ടുണ്ട്.കോഴിക്കോട് ജില്ലയില് കൂരാച്ചുണ്ട് ചക്കിട്ടപാറ മേഖലകള് ബഫര് സോണിലാണ് . ഓരോ വില്ലേജിലെയും പ്ലോട്ട് തിരിച്ചുള്ള വിവരം മാപ്പില് ലഭ്യമാണ്. മാപ്പില് ബഫര് സോണില് ജനവാസ കേന്ദ്രങ്ങള് ഉള്പ്പെട്ടാലും ആശങ്ക വേണ്ടെന്നും സര്ക്കാര് അറിയിച്ചു.
ബഫര്സോണ് വിഷയത്തില് പരാതികളും ആശങ്കകളും അറിയിക്കാന് പുതിയ ഭൂപടം മാനദണ്ഡമാക്കണമെന്ന് സര്ക്കാര് കഴിഞ്ഞ ദിവസം നിര്ദ്ദേശം നല്കിയിരുന്നു. തുടര്ന്നാണ് ഭൂപടം പ്രസിദ്ധീകരിച്ചത്. വിട്ടുപോയ നിര്മിതികള് കൂട്ടിച്ചേര്ക്കാനും നിര്ദേശം ഉണ്ട്
പഞ്ചായത്ത് തലത്തില് സര്വകക്ഷി യോഗങ്ങള് വിളിക്കാനും സര്ക്കാര് നിര്ദേശം നല്കിയിട്ടുണ്ട്. പഞ്ചായത്തില് ഹെല്പ് ഡെസ്ക് തുടങ്ങണം. വാര്ഡ് തലത്തില് പരിശോധന നടത്തണം. പരിശോധന നടത്തേണ്ടത് വാര്ഡ് അംഗം, വില്ലേജ് ഓഫിസര്, വനം വകുപ്പ് ഉദ്യോഗസ്ഥന് എന്നിവര് ചേര്ന്നാകണം. നടപടികള് വേഗത്തിലാക്കാനും പഞ്ചായത്തുകള്ക്ക് നിര്ദേശം നല്കിയിട്ടുണ്ട്.
