തിരുവനന്തപുരം: പൂവാർ കെഎസ്ആർടിസി ഡിപ്പോയിൽ പ്ലസ് വൺ വിദ്യാർത്ഥിക്ക് കെഎസ്ആര്‍ടിസി ജീവനക്കാരന്റെ മർദ്ദനം.അരുമാനൂർ സ്കൂളിലെ പ്ലസ് വൺ വിദ്യാർത്ഥി ഷാനുവിനാണ് മർദ്ദനമേറ്റത്. പെൺകുട്ടികളോട് സംസാരിച്ചു എന്ന് പറഞ്ഞായിരുന്നു മർദ്ദനമെന്ന് വിദ്യാർത്ഥി പറയുന്നു. ഷർട്ട് വലിച്ച് കീറി എന്നും പരാതിയുണ്ട്. കെഎസ്ആര്‍ടിസി കണ്‍ട്രോളിംഗ് ഇൻസ്‌പെക്ടർ സുനിലിനെതിരെയാണ് പരാതി.
പൊഴിയൂര്‍ സ്വദേശിയാണ് വിദ്യാര്‍ത്ഥി. ക്രിസ്മസ് ആഘോഷത്തിനായി കേക്ക് വാങ്ങാനെത്തിയതാണ് താനെന്ന് വിദ്യാര്‍ത്ഥി പോലീസിനോട് പറയുന്നുണ്ട്. വിദ്യാര്‍ത്ഥിയെ മര്‍ദ്ദിക്കുന്നതുകണ്ട് ഡിപ്പോയിലുണ്ടായിരുന്ന ചിലര്‍ ചോദ്യം ചെയ്തിരുന്നു. എന്നാല്‍ ആണ്‍കുട്ടികളും പെണ്‍കുട്ടികളും ഇടപഴകുന്നത് സംബന്ധിച്ച്‌ നിരവധി പരാതികള്‍ ലഭിച്ചതുകൊണ്ടാണ് ഇടപെട്ടതെന്നായിരുന്നു സുനിലിന്റെ വിശദീകരണം.
അതേസമയം, ഒരു കാരണവുമില്ലാതെ ഷാനുവിനെ മര്‍ദ്ദിക്കുകയായിരുന്നെന്നാണ് കൂടെയുണ്ടായിരുന്ന സഹപാഠികള്‍ പറയുന്നത്. വിദ്യാര്‍ത്ഥിയുടെയും ദൃ‌ക്‌സാക്ഷികളുടെയും വിശദമായി മൊഴിയെടുത്തതിന് ശേഷം കേസ് രജിസ്റ്റര്‍ ചെയ്യുമെന്ന് പൂവാര്‍ പോലീസ് അറിയിച്ചു.
കഴിഞ്ഞ ദിവസം, തിരുവനന്തപുരം വെള്ളറടയിൽ കെഎസ്ആർടിസി കണ്ടക്ടർ പ്ലസ് വൺ വിദ്യാർത്ഥിയെ മർദ്ദിച്ചെന്ന് പരാതി ഉയര്‍ന്നിരുന്നു. വെള്ളറട സ്വദേശിയും അമരവിള ഹയർ സെക്കൻഡറി സ്കൂളിലെ പ്ലസ് വൺ വിദ്യാർത്ഥിയുമായ അഭിൻ രാജേഷിനാണ് ( 16 ) മർദനമേറ്റത്. നെഞ്ചിലും മുഖത്തും മർദ്ദനമേറ്റ വിദ്യാർത്ഥി വെള്ളറട സാമൂഹ്യ ആരോഗ്യ കേന്ദ്രത്തിൽ ചികിത്സ തേടി. വെള്ളറട ഡിപ്പോയിലെ കണ്ടക്ടർ മണത്തോട്ടം സ്വദേശി ആനന്ദിനെതിരെയാണ് വിദ്യാർത്ഥിയുടെ അച്ഛൻ രാജേഷ് വെള്ളറട പോലീസിൽ പരാതി നൽകിയിരിക്കുന്നത്.
പ്രതികരിക്കാൻ ഇവിടെ എഴുതുക: