തിരുവനന്തപുരം : പോക്സോ കേസ് പ്രതിയെ പ്രകൃതി വിരുദ്ധ പീഡനത്തിന് ഇരയാക്കിയ പോലീസ് സിഐക്കെതിരെ കേസ്. പത്തനംതിട്ട അയിരൂര്‍ പോലീസ് സ്‌റ്റേഷനിലെ മുന്‍ എസ്എച്ച്ഒ ജയസനിലിനെതിരെയാണ് ആരോപണം ഉയര്‍ന്നിരിക്കുന്നത്. പോക്സോ കേസില്‍ കസ്റ്റഡിയില്‍ എടുത്ത പ്രതിയെ പോലീസ് ക്വാര്‍ട്ടേഴ്‌സില്‍ വെച്ച് പീഡിപ്പിച്ചെന്നാണ് പരാതി.
പോക്സോ കേസിലെ പ്രതി തന്നെയാണ് ഇക്കാര്യം പുറത്തുവിട്ടത്. പീഡന വിവരം പുറത്തറിയാതിരിക്കാന്‍ ഇയാളെ അറസ്റ്റ് രേഖപ്പെടുത്തി റിമാന്‍ഡില്‍ വിട്ടു. മൂന്ന് ദിവസത്തിനകം പ്രതിക്കെതിരെ കുറ്റപത്രവും സമര്‍പ്പിച്ചു. പ്രതി ഇക്കാര്യം വീട്ടുകാരെ അറിയിക്കുകയും അവര്‍ സിഐക്കെതിരെ പരാതി നല്‍കുകയുമായിരുന്നു. പ്രതിയുടെ ജാമ്യം പരിഗണിക്കവേ ഇക്കാര്യം കോടതിയുടെ ശ്രദ്ധയില്‍പ്പെടുത്തുകയും ജാമ്യം അനുവദിക്കുകയുമായിരുന്നു.
പ്രകൃതിവിരുദ്ധ പീഡന പരാതിയില്‍ പോലീസ് ഇയാളുടെ മൊഴിയെടുത്തിട്ടുണ്ട്. നിലവില്‍ സിഐ സസ്‌പെന്‍ഷനിലാണ്. അതേസമയം പോക്സോ കേസ് ഒതുക്കി തീര്‍ക്കാന്‍ സിഐ കൈക്കൂലി വാങ്ങിയെന്നും പരാതിയുണ്ട്. 1,35,000 രൂപയാണ് കൈക്കൂലിയായി വാങ്ങിയത്. കൈക്കൂലി നല്‍കാത്തതില്‍ വ്യാജ കേസെടുത്തതിനാണ് ഇയാളെ സസ്പെന്‍ഡ് ചെയ്തത്. പോക്സോ കേസില്‍ സിഐ ജയസനിലാണ് കുറ്റപത്രം സമര്‍പ്പിച്ചത്. ഇതിലടക്കം വിശദമായ പരിശോധന പോലീസ് നടത്തും.
