തിരുവനന്തപുരം : കോവളത്ത് വിദേശ വനിതയെ ലഹരിമരുന്ന് നല്കി ബലാത്സംഗം ചെയ്ത് കൊലപ്പെടുത്തിയെന്ന കേസിലെ പ്രതികള് കുറ്റക്കാരെന്ന് കോടതി. ഉമേഷ്, ഉദയകുമാര് എന്നിവരാണ് പ്രതികള്. കൊലപാതകം, ബലാത്സംഗം, സംഘം ചേര്ന്നുള്ള ഗൂഢാലോചന, തെളിവ് നശിപ്പിക്കല് എന്നീ കുറ്റങ്ങളാണ് ഇവര്ക്കു നേരെ ആരോപിക്കപ്പെട്ടിരിക്കുന്നത്.
ഇരുവരുടേയും ശിക്ഷ തിങ്കളാഴ്ച വിധിക്കും. തിരുവനന്തപുരം അഡീഷണല് സെഷന്സ് കോടതിയാണ് വിധി പ്രസ്താവന നടത്തുക. ആയുര്വേദ ചികിത്സയാക്കായി തിരുവനന്തപുരത്തെത്തിയ ലാത്വിയന് യുവതിയെയാണ് പ്രതികളായ ഉമേഷ്, ഉദയകുമാര് എന്നിവര് ചേര്ന്ന് പിഡീപ്പിച്ച് കൊലപ്പെടുത്തുകയായിരുന്നു.
2018 മാര്ച്ച് നാലിനാണ് വിദേശ വനിതയെ കാണാതാകുന്നത്. കോവളത്തെത്തിയ വിദേശ വനിതയെ സമീപത്തെ പൊന്തകാട്ടിലേക്ക് കൂട്ടികൊണ്ടുവന്ന് മയക്കുരുന്ന് നല്കിയ ശേഷം പീഡിപ്പിച്ച് കൊലപ്പെടുത്തുകയായിരുന്നു. ഇരുവരുടേയും കുറ്റം കോടതിയില് തെളിഞ്ഞിട്ടുണ്ട്.
യുവതിയെ കാണാതായി ഒന്നരമാസത്തിന് ശേഷമാണ് അഴുകിയ നിലയില് മൃതദേഹം കണ്ടെത്തിയത്. കേസില് കുറ്റപത്രം നല്കി മൂന്നു വര്ഷത്തിനു ശേഷം ഹൈക്കോടതി നിര്ദ്ദേശ പ്രകാരമാണ് ഇപ്പോള് വിധി വരുന്നത്. 30 സാക്ഷികളെയാണ് കേസില് വിസ്തരിച്ചത്. ഇതില് രണ്ടു സാക്ഷികള് കൂറുമാറി. അസി.കമ്മിഷണര് ദിനിലിന്റെ നേതൃത്വത്തിലായിരുന്നു അന്വേഷണം.
