തൃശൂര്: ഗുരുവായൂര് ക്ഷേത്രത്തില് വിവാഹ ഫോട്ടോഷൂട്ടിനിടയില് നവദമ്പതികള്ക്ക് പിന്നില് ആനയിടഞ്ഞു ഒന്നാം പാപ്പാനെ ആക്രമിച്ചു. ഈ മാസം 10ന് ഗുരുവായൂര് ക്ഷേത്രത്തില് നടന്ന വിവാഹത്തിന്റെ ഫോട്ടോഷൂട്ടിനിടയിലാണ് ആനയിടഞ്ഞത്. ആനയെ പെട്ടെന്ന് നിയന്ത്രിക്കാന് കഴിഞ്ഞതിനാല് വന് അപകടം ഒഴിവായി. അല്പസമയത്തേക്ക് പരിഭ്രാന്തി സൃഷ്ടിച്ച ആനയുടെ ദൃശ്യങ്ങള് സാമൂഹിക മാധ്യമങ്ങളില് പ്രചരിക്കുകയും ചെയ്തു.പാലക്കാട് സ്വദേശി നിഖിലിന്റെയും ഗുരുവായൂര് സ്വദേശി അഞ്ജലിയുടെയും വിവാഹ ഫോട്ടോഷൂട്ടിനിടയിലാണ് സംഭവം.
താലികെട്ടിന് ശേഷം ക്ഷേത്രത്തിന്റെ വലതുഭാഗത്തെ നടക്ക് സമീപമായിരുന്നു ഫോട്ടോഷൂട്ട്. ഇതിനിടയില് ക്ഷേത്രത്തില് ശീവേലി എഴുന്നെള്ളിപ്പിനെത്തിച്ച ആനയെ കൊണ്ട് പോകുന്നത് രസകരമായി തോന്നിയതോടെ ദൃശ്യങ്ങള് പകര്ത്തുകയായിരുന്നു. വരനും വധുവിനും തൊട്ട് പിന്നിലെത്തിയ ആന പെട്ടെന്ന് തിരിഞ്ഞ് ഒന്നാം പാപ്പാനെ ആക്രമിക്കുകയായിരുന്നു. പാപ്പാനെ തുമ്പിക്കൈയിലെടുത്ത് ഉയര്ത്തിയെങ്കിലും പിടുത്തം മുണ്ടിലായതിനാല് ഉടുതുണി ഊരി താഴെ വീണു. ഉടന് പാപ്പാന് ഒഴിഞ്ഞു മാറിയതിനാല് തലനാരിഴക്ക് രക്ഷപ്പെടുകയായിരുന്നു. ഇതിനിടയില് ആനപ്പുറത്തുണ്ടായിരുന്ന രണ്ടാം പാപ്പാന് തോട്ടി ഉപയോഗിച്ച് ആനയെ നിയന്ത്രണത്തിലാക്കിയതോടെ കൂടുതല് അനിഷ്ട സംഭവങ്ങളുണ്ടായില്ല. കോഴിക്കോട് വെഡിങ് മോയിറ്റോയിലെ വീഡിയോ ഗ്രാഫര് ജെറി ആണ് ആന ഇടയുന്ന ദൃശ്യങ്ങള് പകര്ത്തിയത്.
