കോഴിക്കോട് : മുസ്ലിം ലീഗ് നേതാവും മുന് എംഎല്എയുമായ കെ.എം. ഷാജിയുടെ വീട്ടില് നിന്നും വിജിലന്സ് പിടിച്ചെടുത്ത പണം തിരികെ വേണമെന്ന ഹര്ജി തള്ളി കോടതി. വീട്ടില് നിന്നും കണ്ടെത്തിയ പണം തെരഞ്ഞെടുപ്പ് ഫണ്ട് ആണെന്നാണ് കെ.എം. ഷാജി കോടതി അറിയിച്ചത്. എന്നാല് ഇതില് സംശയം പ്രകടിപ്പിച്ച കോഴിക്കോട് വിജിലന്സ് കോടതി ഹര്ജി തള്ളുകയായിരുന്നു.
കെ.എം. ഷാജിയുടെ വീട്ടില് നിന്നും 47.35 ലക്ഷം രൂപയാണ് വിജിലന്സ് പിടിച്ചെടുത്തത്. തെരഞ്ഞെടുപ്പ് ഫണ്ടാണ് ഇതെന്നുമാണ് കെ.എം. ഷാജി കോടതിയില് മറുപടി നല്കിയത്. എന്നാല് പണം തെരഞ്ഞെടുപ്പ് ഫണ്ടാണെന്ന് തെളിയിക്കുന്നതിനായി ഹാജരാക്കിയ രേഖകളില് കോടതി സംശയം പ്രകടിപ്പിച്ചിരുന്നു. അതില് തെരഞ്ഞെടുപ്പ് ഫണ്ടിലേക്കായി പണം പിരിക്കുന്ന 20,000 രൂപയുടെ രസീതുകളും ചൂണ്ടിക്കാട്ടിയിരുന്നു.
എന്നാല് ഇരുപതിനായിരം രൂപയുടെ രസീതില് പണം പിരിക്കാന് തെരഞ്ഞെടുപ്പ് കമ്മീഷന്റെ അനുമതിയുണ്ടോ എന്ന് കോടതി ആരായുകയും പണം തിരികെ നല്കണമെന്ന ഹര്ജി കോടതി തള്ളുകയുമായിരുന്നു. ഷാജിയുടെ ആവശ്യം അംഗീകരിച്ചാല് കോഴക്കേസിനെ അത് ബാധിക്കുമെന്ന് വിജിലന്സും കോടതിയില് അറിയിച്ചു. വിധിക്കെതിരെ ഹൈക്കോടതിയില് അപ്പീല് നല്കുമെന്ന് കെ.എം. ഷാജി പ്രതികരിച്ചു.
അഴീക്കോട് ഹയര് സെക്കന്ഡറി സ്കൂളില് പ്ലസ്ടു അനുവദിക്കുന്നതിന് 2013 ല് 25 ലക്ഷം രൂപ കോഴ വാങ്ങിയെന്ന കേസിലാണ് വിജിലന്സ് ഷാജിയുടെ കണ്ണൂര് അഴീക്കോട്ടെ വീട്ടില് റെയ്ഡ് നടത്തിയത്. ഈ പരിശോധനയിലാണ് 47 ലക്ഷത്തിലധികം രൂപ പിടിച്ചെടുത്തത്. 2020 ജനുവരിയിലാണ് ഷാജിയെ പ്രതിയാക്കി വിജിലന്സ് കേസ് രജിസ്റ്റര് ചെയ്തത്.
