കൊച്ചി : ഇലന്തൂര് ഇരട്ട നരബലി കേസിലെ മൂന്നാം പ്രതി ലൈല ഭഗവല് സിങ്ങിന്റെ ജാമ്യ ഹര്ജി കോടതി തള്ളി. ഇരട്ടക്കൊലപാതക കേസില് തന്നെ കസ്റ്റഡിയിലെടുത്ത് ചോദ്യം ചെയ്തു. ഇനി കസ്റ്റഡിയില് തുടരേണ്ടതില്ല. കൊലപാതകവുമായി തനിക്ക് നേരിട്ടോ അല്ലാതെയോ പങ്കില്ല. ആരോപണങ്ങളെല്ലാം കെട്ടിച്ചമച്ചതാണെന്നുമാണ് ലൈലയുടെ ജാമ്യഹര്ജിയില് പറയുന്നത്.
എറണാകുളം ജുഡീഷ്യല് മജിസ്ട്രേറ്റ് കോടതിയാണ് ലൈലയുടെ ജാമ്യ ഹര്ജി തള്ളിയത്. പദ്മ കേസില് 12 ദിവസം പോലീസ് തന്നെ കസ്റ്റഡിയിലെടുത്ത് ചോദ്യം ചെയ്തു. ഇനി കസ്റ്റഡി ആവശ്യമില്ലാത്ത സാഹചര്യത്തില് ജാമ്യം അനുവദിക്കണം. കൊലപാതകത്തില് തനിക്ക് പങ്കില്ലെന്നുമായിരുന്നു ലൈലയുടെ ഹര്ജിയില് പറയുന്നത്. നിലവില് റോസ്ലി കൊലക്കേസില് കാലടി പോലീസ് കസ്റ്റഡിയിലാണ് ലൈല.
എന്നാല് കേസിലെ അന്വേഷണം ഇതുവരെ പൂര്ത്തിയായിട്ടില്ല. ഈ സാഹചര്യത്തില് പ്രതിക്ക് ജാമ്യം അനുവദിക്കരുതെന്നായിരുന്നു പ്രോസിക്യൂഷന് അറിയിച്ചത്. കോടതി ഇക്കാര്യം അംഗീകരിക്കുകയായിരുന്നു. ഒക്ടോബര് 11 നാണ് നരബലി കേസില് മുഹമ്മദ് ഷാഫി, ഭഗവല് സിങ്, ലൈല എന്നിവര് പിടിയിലായത്.
