തിരുവനന്തപുരം : തുലാവര്ഷം ആരംഭിച്ചതോടെ തെക്കന് ജില്ലകളില് ജാഗ്രതാ നിര്ദ്ദേശവുമായി കേന്ദ്ര കാലാവസ്ഥാ നിരീക്ഷണ കേന്ദ്രം. ഏഴ് ജില്ലകളില് ഇന്ന് ജാഗ്രതാ നിര്ദ്ദേശം നല്കി കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം ജില്ലകളിലാണ് കേന്ദ്ര കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കിയിരിക്കുന്നത്.
ഒക്ടോബര് 31 മുതല് നവംബര് 4 വരെയുള്ള തീയതികളില് കേരളത്തില് വ്യാപകമായ മഴക്ക് സാധ്യതയെന്നാണ് അറിയിപ്പ്. ഒറ്റപ്പെട്ട സ്ഥലങ്ങളില് ശക്തമായ ഇടിമിന്നലിനും മഴയ്ക്കും സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്.ചൊവ്വാഴ്ച ആറ് ജില്ലകളിലും മുന്നറിയിപ്പ് നല്കിയിട്ടുണ്ട്. കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിലാണ് ജാഗ്രതാ നിര്ദ്ദേശം.
തുലാവര്ഷത്തിന്റെ ഭാഗമായി ബംഗാള് ഉള്ക്കടലിന് മുകളിലും തെക്കേ ഇന്ത്യക്ക് മുകളിലുമായി വടക്ക് കിഴക്കന് കാറ്റ് ശക്തി പ്രാപിക്കുന്നതിന്റെ ഫലമായി തെക്ക് പടിഞ്ഞാറന് ബംഗാള് ഉള്ക്കടലില് വടക്കന് ശ്രീലങ്കന് തീരത്തിനു മുകളിലായി സ്ഥിതിചെയ്യുന്ന ചക്രവാതചുഴിയുടെയും, ചക്രവാതചുഴിയില് നിന്ന് കേരളത്തിനും തമിഴ്നാടിനും മുകളിലൂടെ തെക്ക് കിഴക്കന് അറബികടല് വരെ നീണ്ടു നില്ക്കുന്ന ന്യുന മര്ദ്ദ പാത്തിയുടെയും സ്വാധീനഫലമായാണ് മഴ ശക്തിപ്പെടുന്നത്.
