കൊല്ലം : കിളികൊല്ലൂരില്‍ സൈനികനേയും സഹോദരനേയും പോലീസ് സ്റ്റേഷനില്‍ വെച്ച് മര്‍ദ്ദിച്ച സംഭവത്തില്‍ സിസിടിവി ദൃശ്യങ്ങള്‍ പുറത്ത്. തര്‍ക്കത്തിനിടെ എഎസ്‌ഐ പ്രകാശ് ചന്ദ്രന്‍ ആദ്യം സൈനികന്റെ മുഖത്ത് കൈവീശി അടിക്കുന്നതും ഇതോടെയാണ് അയാള്‍ തിരിച്ചടിക്കുന്നത്.
രണ്ടര മിനിറ്റുള്ള സിസിടിവി ദൃശ്യങ്ങള്‍ പോലീസാണ് പുറത്തുവിട്ടത്. എംഡിഎഎ കേസിലുള്ളയാളെ ജാമ്യത്തിലിറക്കാന്‍ വിളിച്ചുവരുത്തിയ ശേഷമാണ് പേരൂര്‍ സ്വദേശികളായ വിഘ്‌നേഷിനെയും വിഷ്ണുവിനെയും പോലീസുകാര്‍ ക്രൂരമായി മര്‍ദ്ദിച്ചത്. അടിപിടിക്കിടെ ഇരുവരും നിലത്ത് വീണു. വിഷ്ണുവിന്റെ ഷര്‍ട്ട് എഎസ്‌ഐ പിടിച്ചുവലിക്കുന്നതും ദൃശ്യങ്ങളിലുണ്ട്. എന്നാല്‍ ദൃശ്യങ്ങള്‍ പൂര്‍ണമല്ല.
മഫ്തിയിലുണ്ടായിരുന്ന എഎസ്‌ഐയും സൈനികനായ വിഷ്ണുവും തമ്മിലാണ് ആദ്യം തര്‍ക്കം ഉടലെടുക്കുന്നത്. സൈനികന്‍ തിരിച്ചു തല്ലുയകയും ചെയ്തതോടെ പോലീസ് ഇരുവരേയും മര്‍ദ്ദിക്കുകയും കള്ളക്കേസ് ചമയ്‌ക്കുകയുമായിരുന്നു. ലഹരി കടത്ത് കേസില്‍ പ്രതികളെ കാണാനായി എത്തിയ രണ്ട് യുവാക്കള്‍ പൊലീസ് സ്റ്റേഷനില്‍ അതിക്രമിച്ച് കയറി എഎസ്‌ഐയെ ആക്രമിക്കുന്നു എന്ന തരത്തില്‍ വാര്‍ത്തയും പുറത്തുവിട്ടു.
അതേസമയം യുവാക്കള്‍ക്കെതിരെ കേസ് കെട്ടിച്ചമച്ചാണ് ഇവെരെ മര്‍ദ്ദിച്ചതെന്ന് സ്‌പെഷ്യല്‍ ബ്രാഞ്ച് കണ്ടെത്തിയിട്ടും ആദ്യം കൊല്ലം സിറ്റി പോലീസ് കമ്മിഷണര്‍ ഉദ്യോഗസ്ഥര്‍ക്കെതിരെ നടപടി സ്വീകരിച്ചിരുന്നില്ല. സിഐയും എസ്‌ഐയും യുവാക്കളെ മര്‍ദ്ദിച്ചില്ലെന്നായിരുന്നു കമ്മിഷണറുടെ റിപ്പോര്‍ട്ട്. എസ്‌ഐ അടക്കം നാല് പേരെ അവരുടെ വീടിന് അടുത്തുള്ള പോലീസ് സ്റ്റേഷനിലേക്ക് സ്ഥലം മാറ്റുക മാത്രമാണ് ഉണ്ടായത്. എന്നാല്‍ സംഭവം വാര്‍ത്തയാവുകയും പ്രതിഷേധം ശക്തമാവുകയും ചെയ്തതോടെയാണ് ഇപ്പോള്‍ ഉദ്യോഗസ്ഥരെ സസ്‌പെന്‍ഡ് ചെയ്തത്. സിഐ കെ.വിനോദ്, എസ്‌ഐ അനീഷ് ,ഗ്രേഡ് എസ്‌ഐ പ്രകാശ് ചന്ദ്രന്‍ , സിപിഒ മണികണ്ഠന്‍ പിള്ള എന്നിവരെയാണ് സസ്‌പെന്‍ഡ് ചെയ്തത്.
പ്രതികരിക്കാൻ ഇവിടെ എഴുതുക: