കളമശേരി: സദാചാര ഗുണ്ടകളായി ചമഞ്ഞ് യുവതിയില്‍ നിന്നും യുവാവില്‍ നിന്നും 10,000 രൂപ ഗൂഗിള്‍ പേ വഴി തട്ടിയെടുത്ത മൂന്ന് പേര്‍ പിടിയില്‍. എച്ച്എംപി കോളനി നിവാസികളായ കൂട്ടക്കാട്ട് വീട്ടില്‍ ജലാല്‍ (39), ഞാക്കട വീട്ടില്‍ ഷെരീഫ് (38), പുന്നേക്കാട്ട് ജലീല്‍ (47) എന്നിവരാണ് പിടിയിലായത്.
ബുധനാഴ്ച രാത്രിയായിരുന്നു കളമശേരി എച്ച് എംടി സ്കൂളിന് സമീപം വെച്ച് സംഭവം നടന്നത്. ആലുവയില്‍ ഒരു സ്വകാര്യ സ്ഥാപനത്തില്‍ ജീവനക്കാരിയായ യുവതിയും സുഹൃത്തും കാറിന് പുറന്നു നിന്നും സംസാരിക്കുകയായിരുന്നു. അപ്പോഴായിരുന്നു മൂവരും സദാചാരഗുണ്ടകള്‍ ചമഞ്ഞ് എത്തിയത്.
പ്രതികള്‍ കാറിന്റെ താക്കോള്‍ ഊരിയെടുത്തു. തുടര്‍ന്ന് ബന്ധുക്കളെ വിളിച്ചുവരുത്തുമെന്ന് ഭീഷണിപ്പെടുത്തി. 10,000 രൂപ തന്നാല്‍ ഒഴിവാക്കാമെന്നായി ഭീഷണി. ഒടുവില്‍ സദാചാരഗുണ്ടകള്‍ ഒഴിഞ്ഞുപോകാന്‍ ഗൂഗിള്‍ പേ വഴി യുവാക്കള്‍ക്ക് 10,000 രൂപ അയച്ചുകൊടുത്തപ്പോഴാണ് വിട്ടത്.
യുവതിയും യുവാവും പൊലീസില്‍ പരാതിപ്പെട്ടതിനെ തുടര്‍ന്നുള്ള അന്വേഷണത്തിലാണ് ഇവര്‍ പിടിയിലായത്. പ്രതികളെ ഉടന്‍ കോടതിയില്‍ ഹാജരാക്കും.
