തിരുവനന്തപുരം : പ്രാഥമികാന്വേഷണം നടത്താനും നോട്ടീസയക്കാനുമൊക്കെ അറിയാമെന്ന് മാലോകരെ അറിയിച്ചത് നന്നായെന്ന് ലോകായുക്തയ്ക്കെതിരെ വിമര്ശനവുമായി കെ.ടി. ജലീല് എംഎല്എ. ലോകായുക്തയുടെ നടപടികള് വിവേചനപരമാണെന്നും ജലീല് ഫേസ്ബുക്ക് പോസ്റ്റിലൂടെ വിമര്ശിച്ചു.
‘പത്ത് ദിവസം കൊണ്ട് എല്ലാ നടപടിക്രമങ്ങളും തീര്ത്ത് കക്ഷിക്ക് നോട്ടീസയക്കുകയോ കേള്ക്കുകയോ ചെയ്യാതെ ഏകപക്ഷീയമായി വിധി പറയാന് മാത്രമല്ല, പ്രാഥമികാന്വേഷണം നടത്താനും നോട്ടീസയയ്ക്കാനുമൊക്കെ ബഹുമാനപ്പെട്ട നമ്മുടെ ലോകായുക്തക്ക് അറിയാമെന്ന് മാലോകരെ അറിയിച്ചത് നന്നായി. ജലീലായാല് നിയമവും വകുപ്പും നടപടിക്രമങ്ങളും ബാധകമല്ലല്ലോ അല്ലേ? കോയാ, നമുക്കിതൊക്കെ തിരിയും. നടക്കട്ടെ നടക്കട്ടെ, സംഭവാമി യുഗേ യുഗേ’ എന്നായിരുന്നു ജലീലിന്റെ കുറിപ്പ്.
