മുംബൈ: ട്രെയിനില്‍ സീറ്റിനെ ചൊല്ലിയുണ്ടായ തര്‍ക്കത്തില്‍ വനിതാ യാത്രക്കാര്‍ തമ്മില്‍ ഏറ്റുമുട്ടി. മുംബൈയിലെ താനെ-പനവേല്‍ ലോക്കല്‍ ട്രെയിനില്‍ വനിതകളുടെ കമ്പാര്‍ട്ട്മെന്റില്‍ വ്യാഴാഴ്ചയായിരുന്നു സംഭവം. സീറ്റിനെച്ചൊല്ലി മൂന്ന് സ്ത്രീകള്‍ തമ്മിലുണ്ടായ തര്‍ക്കമാണ് അടിപിടിയില്‍ കലാശിച്ചത്. ഇതിനിടയില്‍ ഡ്യൂട്ടിയിലുണ്ടായ പോലീസുകാരിയ്‌ക്കും പരിക്കേറ്റു. ഇതിന്റെ വീഡിയോയും സാമൂഹികമാധ്യമങ്ങളില്‍ വ്യപകമായി പ്രചരിക്കുന്നുണ്ട്.
മൂന്ന് സ്ത്രീകള്‍ തമ്മിലുള്ള പ്രശ്‌നത്തില്‍ കംമ്പാര്‍ട്ട്‌മെന്റിലെ കൂടുതല്‍ സ്ത്രീകള്‍ ഇടപ്പെട്ടതോടെ സംഭവം വലിയ വഴക്കായത്. രണ്ട് സ്ത്രീകളുടെ തലയ്‌ക്ക് പരിക്കേറ്റ് രക്തം വാര്‍ന്നൊഴുകുന്നതും വീഡിയോയില്‍ കാണാം. ഇതിനിടയിലാണ് പ്രശ്‌നം പരിഹരിക്കാന്‍ എത്തിയ പോലീസുകാരിക്കും പരിക്കേറ്റത്.
സംഭവത്തെക്കുറിച്ച് പോലീസ് പറയുന്നത് ഇങ്ങനെ-തുര്‍ബെ സ്റ്റേഷനില്‍ ഒരു സീറ്റ് ഒഴിഞ്ഞപ്പോള്‍, ഒരു യാത്രക്കാരി അടുത്തുള്ള സ്ത്രീയെ സീറ്റിലിരിക്കാന്‍ അനുവദിച്ചു. എന്നാല്‍, അതേസമയം മറ്റൊരു സ്ത്രീയും അതേ സീറ്റില്‍ ഇരിക്കാന്‍ ശ്രമിച്ചു. ഇതോടെ മൂന്ന് സ്ത്രീകളും തമ്മില്‍ വാക്കേറ്റമുണ്ടാകുകയും മറ്റ് ചില യാത്രക്കാരും ബഹളത്തില്‍ പങ്കുചേരുകയും ചെയ്തു. അതിനിടെ സംഭവം പരിഹരിക്കാനെത്തിയ വനിതാപോലീസിനും അടിക്കിടെ പരിക്കേറ്റു.
