കൊച്ചി: പശുസ്നേഹത്തിന്റെ കഥ പറയുന്ന ചിത്രമായ പാല്‍തു ജാന്‍വര്‍ എന്ന മലയാള സിനിമയുടെ സംവിധായകന്‍ സംഗീത് പി രാജന്‍ സിനിമ റിലീസായ ഉടന്‍ വിവാഹിതനായി. ഈ സിനിമയില്‍ തന്നെ പ്രധാനകഥാപാത്രങ്ങളിലൊന്നിനെ അവതരിപ്പിച്ച ശ്രുതി സുരേഷ് ആണ് വധു. ചങ്ങനാശേരി കുണ്ടൂര്‍ കണ്‍വെന്‍ഷന്‍ സെന്‍ററിലായിരുന്നു വിവാഹം. അതിന് മുന്‍പ് തിരുവല്ല ശ്രീ വല്ലഭ ക്ഷേത്രത്തില്‍ താലികെട്ടി.
കണ്ണൂര്‍ ജില്ലയിലെ ഇരിട്ടിയാണ് സംഗീതിന്റെ നാട്. തിരുവല്ല സ്വദേശിനിയാണ് ശ്രുതി. സംഗീതിന്റെ കന്നിച്ചിത്രമാണെങ്കിലും പാല്‍തു ജാന്‍വര്‍ നല്ല പ്രേക്ഷകശ്രദ്ധ നേടിയിരുന്നു. സംഗീതിന്റെ ആദ്യ സിനിമയായിട്ട് കൂടി ശ്യാം പുഷ്കരന്‍, ഫഹദ് ഫാസില്‍, ദിലീഷ് പോത്തന്‍ എന്നിവരുടെ ഉടമസ്ഥതയിലുള്ള ഭാവന സ്റ്റുഡിയോസാണ് ഈ ചിത്രം നിര്‍മ്മിച്ചത്. കഴിഞ്ഞ ദിവസം മന്ത്രി ചിഞ്ചുറാണി ഈ ചിത്രത്തെ പ്രശംസിച്ച് രംഗത്ത് വന്നിരുന്നു. മൃഗസംരക്ഷണ ക്ഷീരവികസന വകുപ്പ് മന്ത്രി ചിഞ്ചുറാണി ‘പാല്‍തു ജാന്‍വര്‍’ കണ്ട ശേഷം പ്രശംസിച്ചിരുന്നു.
ഇതിലെ പ്രധാന കഥാപാത്രമായ ലൈവ്സ്റ്റോക്ക് ഇൻസ്‌പെക്ടര്‍ പശുക്കളോട് കാണിക്കുന്ന സ്നേഹമാണ് ചിഞ്ചുറാണിയുടെ മനം കവര്‍ന്നത്. കുടിയാന്മല എന്ന ഗ്രാമത്തിലെഒരു വെറ്റിനറി ആശുപത്രിയുടെ പശ്ചാത്തലത്തിലാണ് ഈ കഥ പറയുന്നത്. സിനിമ ഇഷ്ടപെട്ടെന്നും കേരളത്തിലെ എല്ലാ വെറ്റിനറി ഡോക്ടർമാരും ലൈവ്സ്റ്റോക്ക് ഇൻസ്‌പെക്ടർമാരും കണ്ടിരിക്കേണ്ട സിനിമയാണെന്നുമായിരുന്നു മന്ത്രിയുടെ പ്രതികരണം.
കരിക്ക് എന്ന വെബ് സീരിസിലെ പ്രധാന നടി കൂടിയായിരുന്നു ശ്രുതി. ഫ്രീഡം ഫൈറ്റ്, അന്താക്ഷരി, ജൂണ്‍ എന്നീ ചിത്രങ്ങളില്‍ കൂടി അഭിനയിച്ചിട്ടുണ്ട്.
