സിംഗപ്പൂര്‍: മിന്നും ജയത്തോടെ സൈന നെഹ്‌വാള്‍ സിംഗപ്പൂര്‍ ഓപ്പണിന്റെ ക്വാര്‍ട്ടറില്‍. രണ്ടര വര്‍ഷത്തെ ഇടവേളയ്‌ക്ക് ശേഷമാണ് സൈനയുടെ തകര്‍പ്പന്‍ തിരിച്ചുവരവ്. ലോക ഒന്‍പതാം നമ്പര്‍ താരം ചൈനയുടെ ബിങ് ജിയോവിനെയാണ് സൈന തോല്പിച്ചത്. പി.വി. സിന്ധുവും എച്ച്.എസ്. പ്രണോയിയും നേരത്തെതന്നെ സിംഗപ്പൂര്‍ ഓപ്പണിന്റെ ക്വാര്‍ട്ടര്‍ ഫൈനലില്‍ പ്രവേശിച്ചിട്ടുണ്ട്.
അഞ്ചാം സീഡ് താരമായ ബിങ് ജിയോവിനെ 21-19, 11-21, 21-17 എന്ന സ്‌കോറിനാണ് സൈന മറികടന്നത്. മൂന്ന് വര്‍ഷത്തിനിടയില്‍ സൈനയുടെ മികച്ച പ്രകടനമാണ് സിംഗപ്പൂരിലേത്. ഓര്‍ലീന്‍ മാസ്റ്റര്‍ സൂപ്പറില്‍ സെമിഫൈനലിലെത്തിയതാണ് ഇതിന് മുമ്പ് ഉണ്ടായ നേട്ടം. 2020 മലേഷ്യ മാസ്റ്റേഴ്‌സിലും ബാഴ്‌സലോണ സ്‌പെയിന്‍ മാസ്റ്റേഴ്‌സിലും ക്വാര്‍ട്ടറില്‍ കടന്നിരുന്നു.
വിയറ്റ്‌നാമിന്റെ തുയ്‌ലിന്‍ നുയാനെ പരാജയപ്പെടുത്തിയാണ് പി.വി. സിന്ധു ക്വാര്‍ട്ടറില്‍ കടന്നത്. ക്വാര്‍ട്ടറില്‍ ചൈനയുടെ ഹാന്‍ യുവാണ് എതിരാളി. ലോക നാലാം നമ്പര്‍ താരം ചൈനീസ് തായ്‌പേയിയുടെ ചൗതിന്‍ ചെന്നിനെ തോല്‍പ്പിച്ചാണ് പ്രണോയ് ക്വാര്‍ട്ടറില്‍ കടന്നത്. ജപ്പാന്റെ കൊഡായ് നരോക്കയാണ് അടുത്ത ഘട്ടത്തിലെ എതിരാളി.
പ്രതികരിക്കാൻ ഇവിടെ എഴുതുക: