തിരുവനന്തപുരം: സംസ്ഥാനത്തെ സ്കൂളുകളില് നിലവാരമില്ലാത്ത ഉച്ചഭക്ഷണം വിതരണം ചെയ്തത് സംസ്ഥാന സര്ക്കാരിന്റെ പരാജയമാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. സ്കൂളുകളില് നിന്ന് കഴിച്ച ഭക്ഷണത്തില് നിന്ന് കുട്ടികള്ക്ക് ഭക്ഷ്യ വിഷബാധയേറ്റത് ഗുരുതരമായ വീഴ്ചയാണെന്നും അദ്ദേഹം പ്രസ്താവനയില് പറഞ്ഞു.
വിദ്യാഭ്യാസ മന്ത്രി വി.ശിവന്കുട്ടിയും ഭക്ഷ്യമന്ത്രി ജി.ആര് അനിലും സ്കൂളുകള് സന്ദര്ശിച്ചത് കൊണ്ട് ഉത്തരവാദിത്വത്തില് നിന്ന് ഒഴിഞ്ഞുനില്ക്കാനാവില്ല. കുട്ടികളുടെ ഉച്ചഭക്ഷണത്തിന് ഭക്ഷ്യസുരക്ഷ ഒരുക്കുന്നതില് പിണറായി സര്ക്കാര് പരാജയപ്പെട്ടു. വിദ്യാഭ്യാസ ആരോഗ്യ ഭക്ഷ്യസുരക്ഷാ വകുപ്പുകള് തമ്മില് ഏകോപനമില്ലാത്തതാണ് പ്രശ്നങ്ങള്ക്ക് കാരണം. സര്ക്കാര് സംവിധാനങ്ങള് മുഴുവന് തൃക്കാക്കരയില് ക്യാമ്പ് ചെയ്തപ്പോള് സ്കൂള് തുറക്കുന്ന കാര്യവും കുട്ടികള്ക്ക് ഉച്ചഭക്ഷണം നല്കേണ്ട കാര്യവും പിണറായി വിജയന് മറന്നുപോയെന്നും സുരേന്ദ്രന് പറഞ്ഞു.
സംസ്ഥാനത്തെ ഏറ്റവും വലിയ പൊതുമേഖലാ സ്ഥാപനമായ കെഎസ്ആര്ടിസിയെ സര്ക്കാര് ഇല്ലാതാക്കുകയാണ്. ജീവനക്കാരുടെ ശമ്പള വിതരണം വൈകുന്നത് ന്യായീകരിക്കാനാവില്ല. കെഎസ്ആര്ടിസി ജീവനക്കാര്ക്ക് ശമ്പളം പോലും നല്കാനാവാത്ത സര്ക്കാരാണ് കെറെയില് കൊണ്ട് വരുമെന്ന് വീമ്പ് പറയുന്നത്.
ഈ മാസം 20ന് മുന്പ് ശമ്പളം നല്കാന് നിര്വാഹമില്ലെന്ന് കെഎസ്ആര്ടിസി മാനേജ്മെന്റ് തൊഴിലാളികളെ അറിയിച്ചത് മനുഷ്യത്വവിരുദ്ധമാണ്. വിദ്യാലയങ്ങള് തുറക്കുന്ന മാസത്തിലെ ശമ്പള വിതരണത്തിലെ പാളിച്ച സര്ക്കാരിന്റെ ഭരണപരാജയമാണ് തെളിയിക്കുന്നത്. കെടുകാര്യസ്ഥതയും അഴിമതിയുമാണ് കെഎസ്ആര്ടിസിയെ തകര്ത്തതെന്നും സുരേന്ദ്രന് കുറ്റപ്പെടുത്തി.
