ന്യൂദല്‍ഹി: വിലയിലെ ചാഞ്ചാട്ടം അവസാനിപ്പിക്കാന്‍, എണ്ണ ചരക്കുസേവന നികുതിയിലുള്‍പ്പെടുത്തണമെന്ന് എസ്ബിഐ നിര്‍ദേശം. എണ്ണയുടെ നികുതിഘടനയിലെ സങ്കീര്‍ണത ഒഴിവാക്കാനും വിലയിലെ ചാഞ്ചാട്ടം അവസാനിപ്പിക്കാനുമുള്ള അവസാന പരിഹാരം എണ്ണയെ ജിഎസ്ടിയുടെ പരിധിയിലുള്‍പ്പെടുത്തുകയാണ്, റിപ്പോര്‍ട്ടില്‍ എസ്ബിഐ പറയുന്നു.
സംസ്ഥാനങ്ങള്‍ക്ക് നഷ്ടമൊന്നുമില്ലാതെ, എണ്ണ നികുതി അഞ്ചു രൂപ വരെ കുറയ്‌ക്കാന്‍ ഇനിയും സാധിക്കുമെന്നും റിപ്പോര്‍ട്ടില്‍ ചൂണ്ടിക്കാട്ടുന്നു. വില ഉയര്‍ന്ന സമയത്ത്, എണ്ണയുടെ മൂല്യവര്‍ധിത നികുതി (വാറ്റ്) വഴി സംസ്ഥാനങ്ങള്‍ക്കു ലഭിച്ചത് 49,229 കോടി രൂപയാണ്. എന്നാല്‍, എക്‌സൈസ് തീരുവ കുറച്ചതിനാല്‍ അവര്‍ക്ക് 15,021 കോടിയുടെ നഷ്ടമുണ്ടാകും. പക്ഷേ ഉപേക്ഷിച്ച വരുമാനത്തെക്കാള്‍ 34,208 കോടിയുടെ അധിക വരുമാനം ലഭിച്ചതിനാല്‍ അവര്‍ക്ക് സംസ്ഥാന നികുതി കുറച്ച് ജനങ്ങള്‍ക്ക് ആശ്വാസം പകരാം.
വാറ്റ് വരുമാനത്തില്‍ വലിയ കുറവില്ലാതെ ഡീസലിനു കുറഞ്ഞത് രണ്ടു രൂപയും പെട്രോളിനു മൂന്നു രൂപയും കുറയ്‌ക്കാന്‍ സംസ്ഥാനങ്ങള്‍ക്കു സാധിക്കും. മഹാരാഷ്‌ട്ര പോലുള്ള സംസ്ഥാനങ്ങള്‍ക്ക് വരുമാന നഷ്ടമുണ്ടാകാതെ അഞ്ചു രൂപ വരെ കുറയ്ക്കാം.
കേന്ദ്രം എക്‌സൈസ് തീരുവ കുറയ്‌ക്കുമ്പോള്‍ സ്വാഭാവികമായും സംസ്ഥാനങ്ങളിലെ വാറ്റിലും കുറവു വരും. ഇങ്ങനെ വന്ന കുറവല്ലാതെ മിക്ക സംസ്ഥാനങ്ങളും തങ്ങള്‍ക്കു കാര്യമായ നഷ്ടമൊന്നുമില്ലാതെ കുറയ്‌ക്കാന്‍ കഴിയുന്നതു പോലും കുറച്ചിട്ടില്ല, എസ്ബിഐ ചീഫ് എക്കണോമിസ്റ്റ് സൗമ്യകാന്തി ഘോഷ് ഒപ്പിട്ട എസ്ബിഐ റിപ്പോര്‍ട്ടില്‍ പറയുന്നു. കേരളം അടക്കമുള്ള പല സംസ്ഥാനങ്ങളുടെയും ഇരട്ടത്താപ്പ് തുറന്നു കാണിക്കുന്നതാണ് എസ്ബിഐ റിപ്പോര്‍ട്ട്. കേന്ദ്രം ഈയിടെ പെട്രോള്‍ വില 9.50 രൂപയും ഡീസല്‍ വില ഏഴു രൂപയും കുറച്ചിരുന്നു. എന്നാല്‍, പ്രതിപക്ഷം ഭരിക്കുന്ന സംസ്ഥാനങ്ങള്‍ ഇതുവരെ നികുതി കുറച്ചിട്ടില്ല
