ആലപ്പുഴ: ആലപ്പുഴയില് നടന്ന പോപ്പുലര് ഫ്രണ്ട് റാലിയില് കൊച്ചുകുട്ടിയെക്കൊണ്ട് മറ്റു മതവിശ്വാസികള്ക്കെതിരെ കൊലവിളി മുദ്രാവാക്യം വിളിപ്പിച്ചതില് പ്രതിഷേധം ശക്തം. അരിയും മലരും കുന്തിരിക്കവും വാങ്ങിവയ്ക്കണമെന്നും നിന്റെയൊക്കെ കാലന്മാര് വരുന്നുണ്ടെന്നുമാണ് ഒരു കുട്ടി മുദ്രാവാക്യം വിളിക്കുന്നത്. ഒരാളുടെ ചുമലില് കയറി ഇരുന്ന് മുദ്രാവാക്യം വിളിക്കുന്ന ദൃശ്യങ്ങള് സമൂഹമാധ്യമങ്ങളില് പ്രചരിച്ചു. കൊച്ചുകുട്ടികളെ പോലും മതവെറിക്ക് ഉപയോഗിക്കുന്നതിനെതിരെ വ്യാപക പ്രതിഷേധമാണുയരുന്നത്.
ഹിന്ദുക്കള് മരണാനന്തര കര്മ്മങ്ങള്ക്ക് ഉപയോഗിക്കുന്ന അരിയും മലരും ക്രിസ്ത്യാനികള് ഉപയോഗിക്കുന്ന കുന്തിരിക്കവും വാങ്ങിവയ്ക്കണമെന്നാണ് മുദ്രാവാക്യത്തില് ആവശ്യപ്പെടുന്നത്. ബാബറിയില് സുജുദ് ചെയ്യുമെന്നും മുദ്രാവാക്യം വിളിക്കുന്നു. സുപ്രീംകോടതി വിധിയെത്തുടര്ന്ന് അയോധ്യയില് ഉയരുന്ന രാമക്ഷേത്രം തകര്ത്ത് പള്ളി നിര്മ്മിക്കുമെന്ന അര്ത്ഥത്തിലാണ് പോപ്പുലര് ഫ്രണ്ട് ഈ മുദ്രാവാക്യം ഉയര്ത്തുന്നതെന്നാണ് ചൂണ്ടിക്കാട്ടുന്നത്.
മര്യാദയ്ക്ക് കഴിഞ്ഞില്ലെങ്കില് നിന്റെയൊക്കെ കാലന്മാര് വരുന്നുണ്ടെന്നും ഭീഷണിയുണ്ട്. പോപ്പുലര് ഫ്രണ്ടിന്റെ മതഭീകരത കുട്ടികളിലൂടെ പ്രചരിപ്പിക്കുകയാണെന്നും ഇതിനെതിരെ കേസെടുക്കണമെന്നും ആവശ്യമുയര്ന്നിട്ടുണ്ട്.
സമ്മേളനത്തില് സംസാരിച്ച നേതാക്കള് മതവിദ്വേഷം ആളിക്കത്തിക്കുന്ന പ്രസംഗങ്ങള് നടത്തിയിട്ടും പോലീസ് കാഴ്ചക്കാരായിരുന്നു. ഹൈക്കോടതി പോലും മതതീവ്രവാദ സംഘടനകളെന്ന് പ്രഖ്യാപിച്ച പോപ്പുലര്ഫ്രണ്ടിനും എസ്ഡിപിഐക്കും സമ്മേളനം നടത്താന് ജനങ്ങളുടെ ഗതാഗതം പോലും മുടക്കിയാണ് ഭരണകൂടം സൗകര്യം ഒരുക്കി നല്കിയത്.
