ലണ്ടന്: അട്ടിമറി മുന്നില്കണ്ടെങ്കിലും ലിവര്പൂള് വീണില്ല, പൊരുതിക്കയറി വിജയം പിടിച്ചെടുത്തു. രണ്ടാം പകുതിയില് നടത്തിയ പോരാട്ട വീര്യം ലിവര്പൂളിന് നല്കിയത് വിയ്യാറയലിനെതിരെ രണ്ടിനെതിരെ മൂന്ന് ഗോളുകളുടെ ജയം. ഇതോടെ രണ്ട് പാദങ്ങളില് നിന്നുമായി 2-5ന്റെ മുന്തൂക്കം. ചാമ്പ്യന്സ് ലീഗ് ഫൈനലിലേക്ക് ലിവര്പൂളിന്റെ പ്രവേശനം ആധികാരികം.
വിയ്യാറയലിന്റെ തട്ടകത്തിലായിരുന്നു രണ്ടാംപാദം. തുടക്കം മുതല് വിയ്യാറയല് തകര്ത്തുകളിച്ചു. കളി തുടങ്ങി മൂന്നാം മിനിറ്റില് ബൗലയ ഡിയ ഗോളടിച്ചു. വിയ്യാറയലിന് ലീഡ്. ആദ്യ പകുതി അവസാനിക്കും മുമ്പ് ഫ്രാന്സിസ് കോക്വലിന് 41-ാം മിനിറ്റില് ലീഡ് വര്ധിപ്പിച്ചു. ഇതോടെ അട്ടിമറി ലിവര്പൂളും മുന്നില്കണ്ടു. രണ്ട് പാദങ്ങളില് നിന്നുമായി 2-2ന് സമനില. എന്നാല് രണ്ടാം പകുതിയില് തിരിച്ചെത്തിയ ലിവര്പൂള് ഗോളടിമേളം നടത്തി. 12 മിനിറ്റിനിടെ നേടിയത് മൂന്ന് ഗോള്. ഹെന്റിക്വ ഫാബിനോ (62), ലൂയിസ് ഡയസ് (67), സാദിയോ മാനെ (74) എന്നിവര് ഗോള് നേടി. രണ്ടാം പകുതിയില് ലൂയിസ് ഡയസിന്റെ വരവാണ് ലിവര്പൂളിന് കരുത്തായത്.
ക്ലോപ്പിന്റെ പരിശീലനത്തില് അഞ്ച് സീസണിനിടെ മൂന്നാം തവണയാണ് ലിവര്പൂള് ചാമ്പ്യന്സ് ലീഗില് ഫൈനലിലെത്തുന്നത്. മികച്ച മത്സരമാണ് നടന്നതെന്ന് മത്സര ശേഷം ക്ലോപ് പറഞ്ഞു.
Â
