സന്തോഷ് ട്രോഫി വിജയമണി മുഴക്കി മണിപ്പൂര്‍; ഗുജറാത്തിന് തോല്‍വി

മലപ്പുറം: സന്തോഷ് ട്രോഫിയില്‍ ഗുജറാത്തിന്റെ വെല്ലുവിളി മറികടന്ന് മണിപ്പൂരിന് വിജയം. മറുപടിയില്ലാത്ത രണ്ട് ഗോളുകള്‍ക്കാണ് ജയിച്ചത്. വിജയത്തോടെ 3 കളികളില്‍ നിന്ന് ആറ് പോയിന്റായി. ഗുജറാത്തിന്റെ രണ്ടാം തോല്‍വിയാണിത്. ഇതോടെ ഗുജറാത്തിന്റെ സെമി ഫൈനല്‍ പ്രതീക്ഷയ്‌ക്ക് മങ്ങലേറ്റു. കളിച്ച രണ്ട് മത്സരവും തോറ്റ ഗുജറാത്ത് ഗ്രൂപ്പ് ബിയില്‍ അവസാന സ്ഥാനത്താണ്. മണിപ്പൂരിനായി സുധിര്‍ ലൈതോന്‍ജം ഒരു ഗോള്‍ നേടി. ഗുജറാത്തിന്റെ മലയാളി പ്രതിരോധ താരം സിദ്ധാര്‍ത്ഥ് നായര്‍ വഴങ്ങിയ സെല്‍ഫ് ഗോളും മണിപ്പൂരിന് തുണയായി.

കഴിഞ്ഞ മത്സരത്തില്‍ ഇറക്കിയ ആദ്യ ഇലവനില്‍ മാറ്റങ്ങളുമായാണ് ഇരുടീമുകളും ഇറങ്ങിയത്. രണ്ടാം മിനിറ്റില്‍ മണിപ്പൂരിന്റെ ആക്രമണത്തോടെയാണ് മത്സരം ആരംഭിച്ചത്. 14-ാം മിനിറ്റില്‍ ഗുജറാത്തിനാണ് മത്സരത്തില്‍ ആദ്യ ഗോളവസരം ലഭിച്ചത്. മധ്യനിരയില്‍ നിന്ന് ബ്രജേഷ്‌കുമാര്‍ യാദവ് ഉയര്‍ത്തി നല്‍കിയ പാസ് ജയ്‌കനായിക്ക് ലഭിച്ചു. പന്തുമായി മുന്നേറിയ ജയ്‌കനായി ഗോളിക്കീപ്പറെ മറികടന്ന് വലയിലേക്ക് നിറയൊഴിക്കാന്‍ ശ്രമിച്ചെങ്കിലും അതിന് മുന്‍പ് മണിപ്പൂര്‍ ഗോളി പന്ത് രക്ഷപ്പെടുത്തി അപകടമൊഴിവാക്കി. 19-ാം മിനിറ്റിലാണ് മണിപ്പൂരിന് ആദ്യ അവസരം ലഭിച്ചത്. ഗുജറാത്ത് പ്രതിരോധ താരം മുഹമ്മദ് സാഗറലി വരുത്തിയ പിഴവില്‍ നിന്ന് ലഭിച്ച അവസരം എന്‍ഗൗലാല്‍ സിങ്‌സിട് ഗോള്‍ പോസ്റ്റ് ലക്ഷ്യമാക്കി അടിച്ചെങ്കിലും ഗുജറാത്തിന്റെ മലയാളി ഗോള്‍കീപ്പര്‍ അജ്മല്‍ തട്ടിഅകറ്റി.  

രണ്ടാം പകുതിയില്‍ മണിപ്പൂര്‍ ആക്രമണം കൂടുതല്‍ ശക്തമാക്കി. 47-ാം മിനിറ്റില്‍ അവര്‍ ലീഡ് നേടി. നരിയാന്‍ബം ജെനിഷ് സിങ് നല്‍കിയ പാസില്‍ സ്വീകരിച്ച് മധ്യനിര താരം സുധിര്‍ ലൈതോന്‍ജം പായിച്ച ഷോട്ട് സെക്കന്‍ഡ് പോസ്റ്റില്‍ താഴ്ന്നിറങ്ങി. 67-ാം മിനിറ്റില്‍ മണിപ്പൂര്‍ ലീഡ് ഉയര്‍ത്തി. ബോക്‌സിന് പുറത്തുനിന്ന് സോമിഷോന്‍ ഹെഡ് ചെയ്ത് നല്‍കിയ ബോള്‍ ക്ലിയര്‍ ചെയ്യാന്‍ ശ്രമിക്കുന്നതിനിടെ ഗുജറാത്തിന്റെ മലയാളി പ്രതിരോധ താരം സിദ്ധാര്‍ഥ് നായര്‍ പന്ത് സ്വന്തം വലയിലെത്തിക്കുകയായിരുന്നു.  

71-ാം മിനിറ്റില്‍ ഗുജറാത്തിന് നല്ലൊരു അവസരം ലഭിച്ചു. വലതു വിങ്ങില്‍ നിന്ന് ലഭിച്ച ഫ്രീകിക്ക് ഗോള്‍പോസ്റ്റ് ലക്ഷ്യമാക്കി നീങ്ങിയെങ്കിലും മണിപ്പൂര്‍ ഗോള്‍കീപ്പര്‍ തട്ടിയകറ്റി. തുടര്‍ന്ന് കിട്ടിയ അവസരവും വലയിലാക്കാന്‍ സ്ട്രൈക്കര്‍മാര്‍ക്ക് കഴിയാതിരുന്നതോടെ ഗുജറാത്ത് പരാജയം ഏറ്റുവാങ്ങി. നാളെ പയ്യനാട് സ്റ്റേഡിയത്തില്‍ നടക്കുന്ന മത്സരത്തില്‍ ഗുജറാത്തിന് എതിരാളികള്‍ ഒഡീഷയാണ്. മലപ്പുറത്ത് നടക്കുന്ന കളിയില്‍ മണിപ്പൂര്‍ കര്‍ണാടകയുമായും ഏറ്റുമുട്ടും.