തൊടുപുഴ: പതിനേഴുകാരിയെ പീഡിപ്പിച്ച കേസില് ആറ് പേര് അറസ്റ്റില്. ജോലി വാഗ്ദാനം ചെയ്ത് ഇടനിലക്കാരന്റെ നേതൃത്വത്തില് പെണ്കുട്ടിയെ കാഴ്ചവച്ചത് 20ല് അധികം പേര്ക്ക്. കേസില് ഇടനിലക്കാരന് കുമാരമംഗലം മംഗലത്ത് രഘു(ബേബി-51), വര്ക്ക് ഷോപ്പ് ജീവനക്കാരനായ പടി. കോടിക്കുളം പാറപ്പുഴ പിണക്കാട്ട് തോമസ് ചാക്കോ(27), തൊടുപുഴ ജ്യോതി സൂപ്പര്ബസാറില് ലോട്ടറി വില്പ്പനക്കാരനായ ഇടവെട്ടി വലിയജാരം പോക്കളത്ത് ബിനു(43), വാഴക്കുളത്ത് കെഎസ്ഇബി ജീവനക്കാരനായ കല്ലൂര്ക്കാട് വെള്ളാരംകല്ല് ഭാഗത്ത് വാളമ്പിള്ളില് സജീവ്(55), രാമപുരം കുറിഞ്ഞി മണിയാടുംപാറ കൊട്ടൂര് തങ്കച്ചന്(56), മലപ്പുറം പെരിന്തല്മണ്ണ ചേതന റോഡില് കെഎസ്ആര്ടിസി ഭാഗത്ത് മാളിയേക്കല് ജോണ്സണ്(50) എന്നിവരെയാണ് അറസ്റ്റ് ചെയ്തത്.
അച്ഛന് ഉപേക്ഷിച്ച് പോയതിനാല് പെണ്കുട്ടിയും രോഗിയായ അമ്മയുമാണ് വീട്ടിലുള്ളത്. കുടുംബം സാമ്പത്തികമായി ബുദ്ധിമുട്ടുന്നതിനാല് ജോലി സംഘടിപ്പിച്ച് തരാമെന്ന് ബേബി കുട്ടിക്ക് വാദ്ഗാനം നല്കി. ജോലി സംബന്ധമായ കാര്യത്തിനെന്ന് തെറ്റിദ്ധരിപ്പിച്ച് ബേബി പരിചയപ്പെടുത്തിയ തങ്കച്ചനാണ് കുട്ടിയെ ആദ്യം പീഡിപ്പിച്ചത്. ഇതിന് ശേഷം ഒരു വര്ഷമായി കുട്ടിയെ തൊടുപുഴയിലും സമീപ പ്രദേശങ്ങളിലേയും വിവിധ സ്ഥലങ്ങളില് എത്തിച്ച് പീഡിപ്പിച്ചു.
വലിയ തുക പ്രതിഫലം വാങ്ങിയാണ് ബേബി പെണ്കുട്ടിയെ എത്തിച്ച് നല്കിയത്. ബേബിയുടെ പരിചയക്കാരാണ് മറ്റ് പ്രതികള്. ഇയാള്ക്ക് നേരത്തെയും ഇത്തരം ഇടപാടുകള് ഉണ്ടായിരുന്നതായി പോലീസിന് വിവരം ലഭിച്ചിട്ടുണ്ട്. കഴിഞ്ഞ ദിവസം കുട്ടിക്ക് വയറ് വേദന അനുഭവപ്പെട്ടതിനെ തുടര്ന്ന് ആശുപത്രിയില് ചികിത്സ തേടിയപ്പോഴാണ് അഞ്ച് മാസം ഗര്ഭിണിയാണെന്ന വിവരം അറിഞ്ഞത്. ഇവിടെ പ്രായം തെറ്റായാണ് നല്കിയത്.
സംശയം തോന്നിയ ഡോക്ടര്മാര് ചൈല്ഡ് ലൈനില് വിവരം അറിയിക്കുകയായിരുന്നു. തുടര്ന്ന് വിവരം തൊടുപുഴ പോലീസിന് കൈമാറി. തൊടുപുഴ എസ്എച്ച്ഒ വി.സി. വിഷ്ണുകുമാറിന്റെ നേതൃത്വത്തിലാണ് പ്രതികളെ അറസ്റ്റ് ചെയ്തത്.
പോക്സോ വകുപ്പ് ചുമത്തിയ പ്രതികളെ കോടതിയില് ഹാജരാക്കി റിമാന്ഡ് ചെയ്തു. പെണ്കുട്ടിയെ സുരക്ഷിത കേന്ദ്രത്തിലേക്ക് മാറ്റി. കേസില് തുടരന്വേഷണത്തിനും മറ്റ് പ്രതികളെ പിടികൂടാനുമായി മുഖ്യപ്രതിയെ അടക്കം കസ്റ്റഡിയില് വാങ്ങും.
