വര്ണങ്ങളുടെ ആഘോഷമാണ് ഹോളി. വര്ണപ്പൊടികള് വാരിയെറിഞ്ഞുള്ള ആഘോഷത്തിമിര്പ്പ്. ഹോളിയോളം പ്രസിദ്ധമല്ലെങ്കിലും സമാനമയൊരു ആഘോഷമുണ്ട് തമിഴ്നാട് -കര്ണാടക അതിര്ത്തി ഗ്രാമമായ ഗുമാട്ടപുരയില്. ഗ്രാമീണര് പരസ്പരം ചാണകമെറിഞ്ഞ് ആഘോഷിക്കുന്ന ‘ഗോരെഹബ്ബ’. തമിഴ്നാട്ടിലാണ് ഗുമാട്ടപുരയെങ്കിലും ഗ്രാമീണരില് ഭൂരിഭാഗവും കന്നഡിഗരാണ്. കര്ണാടകത്തിലെ ചാമരാജ് നഗര് ജില്ലയുടെ അതിര്ത്തിയിലാണ് ഗുമാട്ടപുര.
ദീപാവലിയുടെ തൊട്ടടുത്ത നാളിലാണ് ഗോരെഹബ്ബ ആഘോഷങ്ങള്. ചാണകം കൊണ്ട് നല്ല പൊക്കത്തില് കൂനകളുണ്ടാക്കി അതിന്മേല് കയറി പരസ്പരം ചാണകം വാരിയെറിയുന്ന ആഘോഷത്തില് പുരുഷന്മാരാണ് പങ്കെടുക്കുക. ഗുമാട്ടപുരയിലെ ബീരേശ്വര ക്ഷേത്രത്തിനു സമീപമാണ് ചാണകക്കൂനകള് ഉണ്ടാക്കുന്നത്. ചാണകം ശേഖരിക്കുന്നത് വീടുകളില് നിന്നാണ്.
ഉച്ചയ്ക്കു ശേഷമാണ് ആഘോഷങ്ങള് തുടങ്ങുക. ഗ്രാമത്തിലെ തന്നെ, കാരപാപ്പ ക്ഷേത്രത്തില് പൂജ ചെയ്ത ശേഷം ഗ്രാമീണരില് രണ്ടുപേര് പരമ്പരാഗത വേഷവിധാനങ്ങളോടെ കഴുതപ്പുറത്തേറി, ചാണകം എറിയാന് തയ്യാറാക്കിയ കൂനയ്ക്കരികെയെത്തും. ‘കൊണ്ടക്കാര്’ എന്നാണ് ഇവര് അറിയപ്പെടുക.
പൂജാദികര്മ്മങ്ങള്ക്കു ശേഷം, രണ്ടു പക്ഷമായി തിരിഞ്ഞുള്ള ചാണകമേറ് സന്ധ്യയോളം നീളും. ഗുമാട്ടപുരയിലെ ഈ ആഘോഷത്തിനു പിറകില് നൂറ്റാണ്ടുകള് പഴക്കമുള്ളൊരു കഥയുണ്ട്. സ്ഥലത്തെ പ്രധാനിയായിരുന്ന ഒരു ഗൗഡയുടെ വീട്ടുജോലിക്കാരന് ഒരുനാള് മരിച്ചു. അയാളുടെ ഭാണ്ഡക്കെട്ട് വീട്ടുകാരെടുത്ത് കൂട്ടിയിട്ട ചാണകത്തിനു മുകളിലേക്കെറിഞ്ഞു. ഒരിക്കല് ആ ഭാണ്ഡത്തിനു മുകളിലൂടെ കയറിയിറങ്ങിയ ഒരു കാളവണ്ടിയുടെ ചക്രം ഇളകിപ്പോയി. മാത്രവുമല്ല, ഭാണ്ഡത്തിനരികെ കണ്ട ശിവലിംഗാകൃതിയിലുള്ള ഒരു കല്ലില് നിന്ന് രക്തം പ്രവഹിച്ചു കൊണ്ടിരുന്നു.
അന്നു രാത്രി വീട്ടിലെ കാരണവര്ക്ക് ഒരു സ്വപ്നദര്ശനമുണ്ടായി. ആ ഭാണ്ഡമിരുന്ന ചാണകക്കൂനയ്ക്കടുത്ത് ക്ഷേത്രം പണിയണമെന്നും എല്ലാവര്ഷവും ചാണകമെറിഞ്ഞ് ഉത്സവം നടത്തണമെന്നും ഒരു ദിവ്യതേജസ്സ് അരുളിച്ചെയ്തു. ഗുമാട്ടപുരയിലെ ബീരേശ്വര ക്ഷേത്രത്തിന്റെയും അവിടുത്തെ അത്യപൂര്വ ആഘോഷത്തിന്റെ തുടക്കം ഇതാണ്.
