സുരാജ് വെഞ്ഞാറമ്മൂടിന്റെ സഹോദരന് സജി വെഞ്ഞാറമ്മൂട് പ്രധാന കഥാപാത്രമാകുന്ന അല്ലി ഈ മാസം 11ന് തിയേറ്ററുകളിലേക്ക്. സജി ആദ്യമായി പ്രധാന വേഷത്തിലെത്തുന്ന ചിത്രം കൂടിയാണ് അല്ലി. ഹൈ ഫൈവ് ഫിലിംസിനു വേണ്ടി രാജ്കുമാര് എസ്. രചനയും സംവിധാനവും നിര്വ്വഹിക്കുന്നു.
സജി വെഞ്ഞാറമ്മൂട് ഒരു മേസ്തിരിപ്പണിക്കാരന്റെ വേഷത്തിലാണ് ചിത്രത്തില് അഭിനയിക്കുന്നത്. തുടക്കത്തില് തന്നെ ശക്തമായൊരു കഥാപാത്രത്തെ ലഭിച്ചതില് സന്തോഷിക്കുന്നു. നന്നായി അവതരിപ്പിക്കാന് ശ്രമിച്ചിട്ടുണ്ട്. സജി വെഞ്ഞാറമ്മൂട് പറയുന്നു.
ഒരു മലയടിവാരത്തുള്ള ഗ്രാമത്തിലാണ് മേസ്തിരിയുടെ താമസം. മകള് അല്ലി (അപര്ണ്ണാ മോഹന്) മാത്രമെ കൂടെയുള്ളു. ഭാര്യ മുമ്പേ മരിച്ചു. അയല്പക്കത്ത് താമസമുള്ള സുമതിയമ്മ (നീനാ കുറുപ്പ്) വലിയൊരു സഹായമാണ്. മറ്റ് ഗ്രാമങ്ങളില് മേസ്തിരി, പണിക്ക് പോകുമ്പോള് സുമതിയമ്മയാണ് അല്ലിയെ സംരക്ഷിക്കുന്നത്. മദ്യപാന ശീലമുള്ള മേസ്തിരിക്ക് പല കാര്യങ്ങളും ശ്രദ്ധിക്കാന് കഴിയാതെ പോകുന്നു. അതിന്റെ ദുരന്തം ഏറ്റുവാങ്ങേണ്ടി വന്നത് മകള് അല്ലിയായിരുന്നു. ഒടുവില് പ്രകൃതി തന്നെ അവള്ക്ക് രക്ഷാകവചം ഒരുക്കുകയായിരുന്നു.
ഹൈ ഫൈവ് ഫിലിംസിനു വേണ്ടി എസ്.ശ്രീകുമാര് ,ഗൗതം രാജ്, ഡോ.അമ്മു ടി ദീപ് എന്നിവര് ചേര്ന്നാണ് നിര്മാണം. ഡിഒപി – ജയന് ദാസ്, എഡിറ്റര് – അരുണ്ദാസ്, ഗാനങ്ങള് – ശ്യാം നെല്ലിക്കുന്നേല്, സംഗീതം – സതീശ്, പിആര്ഒ- അയ്മനം സാജന്, വിതരണം – സൂരി ഫിലിംസ്
ശിവദാമോദര്, വിപിന് കുട്ടപ്പന്, ശ്രീ പ്രസാദ്, ശിവരഞ്ജിനി എന്നിവരും ചിത്രത്തില് പ്രധാന വേഷത്തില് എത്തുന്നുണ്ട്.
