കൊച്ചി: ഏകീകൃത സിവില് കോഡ് ബിജെപിയുടെ രഹസ്യ അജന്ഡയല്ല, പരസ്യമായ അജന്ഡ തന്നെയാണെന്നും അതിന്റെ പേരില് ഗവര്ണറെ വേട്ടയാടരുതെന്നും ബിജെപി സംസ്ഥാന അധ്യക്ഷന് കെ.സുരേന്ദ്രന്. കേരള ഗവര്ണര്ക്കെതിരെ ലീഗും സിപിഎമ്മും നടത്തുന്നത് വ്യാപക ആക്രമണമാണ്. ഇത് അവസാനിപ്പിക്കണമെന്നും സുരേന്ദ്രന് ആവശ്യപ്പെട്ടു.
ജനസംഘ കാലം മുതല് ഏക സിവില് കോഡിന് വേണ്ടി വാദിക്കുന്നവരാണ് ഞങ്ങള്. ഉത്തരാഖണ്ഡ് മുഖ്യമന്ത്രി ഇത് കഴിഞ്ഞ ദിവസം പോലും പറഞ്ഞതാണ്. മോദി സര്ക്കാര് അത് നടപ്പാക്കുക തന്നെ ചെയ്യുമെന്നും സുരേന്ദ്രന് വ്യക്തമാക്കി.
ഇഎംഎസിനും സിപിഎമ്മിനും ഏകീകൃത സിവില് കോഡ് വരണമെന്ന നിലപാടായിരുന്നു ഉണ്ടായിരുന്നത്. എന്നാല് ഇപ്പോള് അവര് അത് മാറ്റി യൂടേണ് അടിച്ചിരിക്കുകയാണ്. രാജ്യത്തെ ഒന്നിപ്പിക്കാനാണ് ഏക സിവില് കോഡ് എന്നിരിക്കെ ഇതിനെതിരെയുള്ള നീക്കം ജനങ്ങളെ ഭിന്നിപ്പിക്കാനുള്ള ശ്രമമാണെന്നും സുരേന്ദ്രന് ആരോപിച്ചു.
സതീശനും കുഞ്ഞാലിക്കുട്ടിയും ഗവര്ണറെ ആക്രമിക്കുന്നത് പിണറായിയെ രക്ഷിക്കാനാണെന്നും സുരേന്ദ്രന് കൂട്ടിച്ചേര്ത്തു.
