തിരുവനന്തപുരം: ജമാ അത്തെ ഇസ്ലാമിയുടെ കീഴിലുള്ള ചാനലുകള്ക്കെതിരെ ആഭ്യന്തരമന്ത്രാലയം നടപടി അഞ്ചുവര്ഷം മുമ്പേ തുടങ്ങിയിരുന്നുവെന്ന് രേഖകള്. മീഡിയ വണ് ന്യൂസ് ചാനലിന് പുറമെ മീഡിയ വണ് ലൈഫ് എന്നൊരു ചാനല്കൂടി ജമാ അത്തെ ഇസ്ലാമി കേരളത്തില് തുടങ്ങാന് പദ്ധതി ഇട്ടിരുന്നു. അന്ന് ആഭ്യന്തരമന്ത്രാലയം ഈ ചാനല് തുടങ്ങാന് അനുമതി നല്കിയിരുന്നില്ല. സുരക്ഷാ കാരണങ്ങള് മുന് നിര്ത്തിയാണ് ചാനലിന്റെ അനുമതി ഒന്നാം മോദി സര്ക്കാര് റദ്ദാക്കിയത്.
എന്നാല്, ഈ ബ്ലാക്ക്ഔട്ട് നടപടി ജമാ അത്തെ ഇസ്ലാമിയും മീഡിയ വണ്ണും രഹസ്യമാക്കി വയ്ക്കുകയായിരുന്നു. ജമാ അത്തെ ഇസ്ലാമിയുടെ പല സാമ്പത്തിക ഇടപാടുകളും ആഭ്യന്തരമന്ത്രിയായിരുന്നു രാജ്നാഥ് സിംഗിന്റെ നേതൃത്വത്തില് നിരീക്ഷിച്ചിരുന്നു. ഇതിന്റെ അടിസ്ഥാനത്തിലാണ് മീഡിയ വണ് ലൈഫ് എന്ന ചാനലിന് അനുമതി നിക്ഷേധിച്ചത്. 2016ല് മീഡിയ വണ് ചാനലിനും ആഭ്യന്തരമന്ത്രാലയം താക്കീത് നല്കിയിരുന്നു. ഇതിന് ശേഷമാണ് അപ്പ് ലിങ്ക്, ഡൗണ് ലിങ്ക് അനുമതികള് വീണ്ടും അഞ്ചുവര്ഷത്തേക്ക് പുതുക്കി നല്കിയത്.
അതേസമയം, മീഡിയ വണ് നിരോധനത്തില് സിംഗിള് ബെഞ്ച് വിധി സ്റ്റേ ചെയ്യില്ലെന്ന് ഹൈക്കോടതി ഡിവിഷന് ബെഞ്ച് വ്യക്തമാക്കിയിരുന്നു. ഇടക്കാല ഉത്തരവോ അന്തിമ വിധിയോ വേണോയെന്ന് ചീഫ് ജസ്റ്റിസ് എസ്.മണികുമാറും ജസ്റ്റിസ് ഷാജി പി ചാലിയും അടങ്ങുന്ന ഡിവിഷന് ബെഞ്ച് അപ്പീല്ക്കാരോട് ചോദിച്ചു.അന്തിമ വിധിയാണ് തങ്ങള് ഇഷ്ടപ്പെടുന്നതെന്ന് അറിയിച്ചതിനെ തുടര്ന്ന് സിംഗിള് ജഡ്ജിയുടെ തീരുമാനത്തിന് ഇടക്കാല സ്റ്റേ അനുവദിക്കില്ലെന്ന് കോടതി വ്യക്തമാക്കി.
വിഷയം പരിഗണിച്ചപ്പോള്, മുദ്രവച്ച കവറില് ചില രേഖകള് ഹാജരാക്കാനും വിഷയത്തില് കൗണ്ടര് ഫയല് ചെയ്യാനും എഎസ്ജിഐ അമന് ലേഖി സമയം ആവശ്യപ്പെട്ടിരുന്നു. എന്നാല് ചാനലിന് വേണ്ടി ഹാജരായ മുതിര്ന്ന അഭിഭാഷകന് ദുഷ്യന്ത് ദവെ ഇതിനെ എതിര്ക്കുകയും ഇത് അസംബന്ധമാണെന്ന് വാദിക്കുകയും ചെയ്തു. ഹ്രസ്വമായ ചര്ച്ചയ്ക്ക് ശേഷം വാദങ്ങള് അവതരിപ്പിക്കാന് മുതിര്ന്ന അഭിഭാഷകനെ കോടതി അനുവദിച്ചു. വാദത്തിനു ശേഷമാണ് വിധി പറയാന് കേസ് മാറ്റിയത്. അതുവരെ വിലക്ക് തുടരും.
ചാനലിനെതിരായ കണ്ടെത്തലുകള് അതീവ ഗുരുതരമെന്നും കേന്ദ്ര നിലപാട് ശരിയാണെന്നും ആദ്യ വിധി സമയത്ത് കോടതി വിലയിരുത്തിയിരുന്നു. കോടതി ആവശ്യപ്പെട്ട, വിലക്കുമായി ബന്ധപ്പെട്ട ആഭ്യന്തര മന്ത്രാലയത്തിന്റെ മുഴുവന് ഫയലുകളും കേന്ദ്ര സര്ക്കാരിന്റെ അസി. സോളിസിറ്റര് ജനറല് എസ്. മനു കോടതിക്ക് കൈമാറിയിരുന്നു. മുദ്ര വച്ച കവറില് നല്കിയത് രഹസ്യരേഖകളായതിനാല് അവ മീഡിയ വണ്ണിന്റെ അഭിഭാഷകന് കൈമാറാനാവില്ലെന്ന് കോടതി വ്യക്തമാക്കി നേരത്തെ വ്യക്തമാക്കി.
