കേരളപുരം: കൊറ്റംകര പഞ്ചായത്തിലെ ഇരുപതാം വാര്ഡില് ഉയര്ച്ചയിലുള്ള റോഡ് തകര്ന്നതുകാരണം സമീപവാസികളായ 12 കുടുംബങ്ങള് ദുരിതത്തില്.
കൊറ്റംങ്കര വില്ലേജ് ആഫീസിന് സമീപം മുടപ്പിലാംങ്ങല് കളരി ക്ഷേത്രത്തിന് മുന്വശം റോഡ് നിരപ്പില്നിന്നും 20 അടിയോളം താഴ്ചയില് താമസിക്കുന്നവരാണ് യാത്രാദുരിതം അനുഭവിക്കുന്നത് അംഗവൈകല്യമുള്ളവരും പട്ടികജാതിവിഭാഗങ്ങളും വിധവകളും മാനസിക വൈകല്യമുള്ളവരുമായ കുടുംബങ്ങളാണ് ഇവിടെ താമസിക്കുന്നവയിലേറെയും.
ഈ സ്ഥലത്തേക്ക് നടന്നുപോകാനായി മാത്രം ഉണ്ടായിരുന്ന നടവഴി കഴിഞ്ഞ കാലവര്ഷത്തില് ഇടിഞ്ഞ് വീണതാണ്. തുടര്ന്ന് ഇവിടെ താമസിച്ച് വരുന്നവര്ക്ക് സ്വന്തം വീട്ടിലേക്ക് വരാനോ പുറത്ത് ജോലിക്ക് പോകാനോ കഴിയാത്ത സ്ഥിതിയായി. പ്രദേശത്ത് അടിയന്തിരമായി നടപ്പാത നിര്മിക്കണമെന്ന് ആവശ്യപ്പെട്ട് പഞ്ചായത്തിലും ജനപ്രതിധികള്ക്കും അപേക്ഷിച്ചിട്ടും ഫലമുണ്ടായില്ല. വഴിനിര്മാണത്തിന് 15 ലക്ഷത്തോളം രൂപ ചെലവ് വരുമെന്നാണ് പഞ്ചായത്തിന്റെ കണക്ക്. ഉണ്ടായിരുന്ന നടവഴി കൂടി ഇടിഞ്ഞ് വീണതോടെ മറ്റ് സഞ്ചാരമാര്ഗങ്ങള് ഇവിടുത്തെ ജനങ്ങള്ക്ക് ഇല്ലാതായിരിക്കുകയാണ്.
അടിയന്തിരമായി നടപ്പാത നിര്മിച്ച് പ്രദേശത്തെ ജനങ്ങളുടെ ദുരിതത്തിന് പരിഹാരം ഉണ്ടാക്കണമെന്ന് സ്ഥലം സന്ദര്ശിച്ച ബിജെപി ദേശീയ സമിതി അംഗം എം.എസ്. ശ്യാംകുമാര് ആവശ്യപ്പെട്ടു. ഈ ആവശ്യം ഉന്നയിച്ച് പഞ്ചായത്തുമെമ്പര് വിനീതയുടെ നേതൃത്വത്തില് ജില്ലാ കളക്ടര്ക്ക് നിവേദനവും നല്കി.
