കൊടുങ്ങല്ലൂര്‍: നവീകരണ പ്രവര്‍ത്തികള്‍ പൂര്‍ത്തിയാകുന്ന ചേരമാന്‍ ജുമാമസ്ജിദിന്റെ സ്പെഷ്യല്‍ തപാല്‍ കവര്‍ പുറത്തിറക്കി. പള്ളി അങ്കണത്തില്‍ അഡ്വ. വി.ആര്‍. സുനില്‍കുമാര്‍ എംഎല്‍എയ്‌ക്ക് തപാല്‍ കവര്‍ നല്കി കൊച്ചി സെന്‍ട്രല്‍ റീജിയന്‍ പോസ്റ്റ് മാസ്റ്റര്‍ ജനറല്‍ മറിയാമ്മ തോമസ് പ്രകാശനം ചെയ്തു.
തപാല്‍ വകുപ്പാണ് മുസിരിസ് പൈതൃക പദ്ധതിക്കായി സ്പെഷ്യല്‍ കവര്‍ ഒരുക്കിയത്. മുസിരിസ് മുദ്രയും, ചേരമാന്‍ പള്ളിയുടെ ചിത്രവും ആലേഖനം ചെയ്ത മൈ സ്റ്റാംപ് പ്രകാശനവും നടന്നു. ചടങ്ങില്‍ കൊടുങ്ങല്ലൂര്‍ നഗരസഭ വൈസ് ചെയര്‍മാന്‍ കെ. ആര്‍. ജൈത്രന്‍, മുസിരിസ് പൈതൃക പദ്ധതി എംഡി പി.എം. നൗഷാദ്, ചേരമാന്‍ മസ്ജിദ് കമ്മിറ്റി പ്രസിഡന്റ് ഡോ. മുഹമ്മദ് സയീദ് തുടങ്ങിയവര്‍ പങ്കെടുത്തു.
