കൊച്ചി : നടി ആക്രമിച്ച കേസ് അന്വേഷിച്ച ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് ദിലീപിന്റെ മുന്കൂര് ജാമ്യ അടിയന്തിരമായി പരിഗണിക്കണമെന്ന് ഹര്ജി. കേസ് ഇന്ന് തന്നെ പരിഗണിക്കണമെന്നാവശ്യപ്പെട്ട് പ്രോസിക്യൂഷനാണ് കോടതിയെ സമീപിച്ചിരിക്കുന്നത്. ഹര്ജി കോടതി ഫയലില് സ്വീകരിച്ചിട്ടുണ്ട്. ഇന്ന് 1.45 ന് കേസ് ഹൈക്കോടതി പരിഗണിക്കും.
കേസുമായി ദിലീപ് സഹകരിക്കുന്നില്ല. പ്രധാന തെളിവ് ആയ മൊബൈല് ഫോണ് അന്വേഷണ സംഘത്തിന് മുമ്പാകെ ഹാജരാക്കിയില്ല. പ്രതികളെ കസ്റ്റഡിയില് വേണമെന്നും ഹര്ജിയില് ആവശ്യപ്പെടുന്നുണ്ട്. നല്കിയത്. മൊബൈല് ഹാജരാക്കാന് ദിലീപിന് നിര്ദ്ദേശം നല്കണമെന്നും ആവശ്യപ്പെടും.
ചോദ്യംചെയ്യലിനെത്തുമ്പോള് ഫോണുകള് ഹാജരാക്കാന് അന്വേഷണ സംഘം നോട്ടീസ് നല്കിയിരുന്നു. എന്നാല്, ദിലീപ് അടക്കമുള്ള പ്രതികള് ഇതിനു തയ്യാറായിരുന്നില്ല. ദിലീപ് അടക്കമുള്ള പ്രതികള് മൊബൈല് ഫോണുകള് ഒളിപ്പിച്ചെന്നും ഇത് കണ്ടെത്താന് കൂടുതല് ചോദ്യം ചെയ്യേണ്ടതുണ്ടെന്നുമുള്ളനിലപാടിലാണ് അന്വേഷണസംഘം.
ദിലീപ് അടക്കം ആറ് പ്രതികളുടെ മുന്കൂര് ജാമ്യ ഹര്ജി ബുധനാഴ്ച പരിഗണിക്കാനായിരുന്നു കോടതി മാറ്റിയത്. ദിലീപിന്റെ വീട്ടില് നടത്തിയ തെരച്ചിലില് പിടിച്ചെടുത്ത ഡിജിറ്റല് തെളിവുകള് പരിശോധിക്കാന് സാവകാശം വേണമെന്ന സര്ക്കാര് ആവശ്യത്തെ തുടര്ന്നായിരുന്നു നടപടി. തുടര്ന്ന് ദിലീപ് അടക്കമുള്ളവരുടെ അറസ്റ്റ് തടഞ്ഞ നടപടി ഹൈക്കോടതി ബുധനാഴ്ചവരെ നീട്ടുകയും ചെയ്തിരുന്നു. ഇതിന് പിന്നാലെയാണ് ദിലീപിന്റെ മുന്കൂര് ജാമ്യ ഹര്ജി ഇന്ന് പരിഗണിക്കണമെന്ന ആവശ്യവുമായി പ്രോസിക്യൂഷന് വീണ്ടും ഹൈക്കോടതിയെ സമീപിച്ചത്.
കേസിന്റെ അന്വേഷണ പുരോഗതി റിപ്പോര്ട്ടും ഇന്ന് വിചാരണക്കോടതിയില് സമര്പ്പിക്കും. സംവിധായകന് ബാലചന്ദ്ര കുമാറിന്റെ വെളിപ്പെടുത്തലുകളുടെ അടിസ്ഥാനത്തിലാണ് തുടരന്വേഷണം നടത്തിയത്.
അതേസമയം കേസില് ദിലീപിനെതിരെ നിര്ണായക തെളിവ് കണ്ടെത്തിയെന്ന് ക്രൈംബ്രാഞ്ച്. കേസിലെ വിചാരണക്ക് ശേഷം അന്വേഷണ ഉദ്യോഗസ്ഥരെ വധിക്കാം എന്ന് ദിലീപ് പറയുന്ന ഓഡിയോ ക്ലിപ്പ് അന്വേഷണ സംഘത്തിന് ലഭിച്ചു. ഈ തെളിവ് ഇന്ന് കോടതിയില് സമര്പ്പിക്കും.
എന്നാല് കേസ് കെട്ടിച്ചമച്ചതാണെന്നും ഫോണ് ഹാജരാക്കാനാകില്ലെന്നുമാണ് ദിലീപിന്റെ മറുപടി. അന്വേഷണസംഘത്തിന്റെ ആവശ്യങ്ങള് അംഗീകരിക്കാനാകില്ല. നിലവിലുള്ള കേസുമായി ബന്ധപ്പെട്ട തെളിവുകള് ഫോണില് ഇല്ല. ഫോണ് ശാസ്ത്രീയ പരിശോധനയ്ക്ക് അയച്ചു. പരിശോധനാ ഫലം കിട്ടുമ്പോള് കോടതിയില് നല്കാമെന്നും ദിലീപ് വ്യക്തമാക്കി.
