പാലാ: കൊട്ടാരമറ്റം പ്രൈവറ്റ് ബസ് സ്റ്റാന്ഡിനുള്ളില് പ്രണയം നടിച്ച് നഗരത്തിലെ പ്രമുഖ സ്കൂളിലെ എട്ടാം ക്ലാസ് വിദ്യാര്ഥിനിയെ പീഡിപ്പിക്കാന് ശ്രമിച്ച രണ്ട് പേര് അറസ്റ്റില്. സംക്രാന്തി സ്വദേശി തുണ്ടിപ്പറമ്പില് അഫ്സല്(27), അയ്യപ്പന്കോവില് വില്ലേജില് ലബ്ബക്കട ഭാഗത്ത് കൊല്ലംപറമ്പില് വീട്ടില് എബിന് ജോസഫ് (27) എന്നിവരാണ് അറസ്റ്റിലായത്. വിദ്യാര്ഥിനിയെ, പ്രണയം നടിച്ച് വശീകരിക്കുകയായിരുന്നു.
ശനിയാഴ്ച ഉച്ചയ്ക്ക് ഒരു മണിയോടെ സ്കൂള് കഴിഞ്ഞ് വിദ്യാര്ഥിനി പ്രതിയുടെ ആവശ്യപ്രകാരം കൊട്ടാരമറ്റം ബസ്റ്റാന്ഡില് എത്തുകയായിരുന്നു. പിന്നീട് പ്രതിയുടെ സുഹൃത്തുക്കളായ കണ്ടക്ടറും ഡ്രൈവറും ഉച്ചയ്ക്ക് ഒന്നരക്കുള്ള ട്രിപ്പ് ആളില്ല എന്ന കാരണത്താല് മുടക്കി.
പെണ്കുട്ടിയെ ബസിനുള്ളില് കയറ്റിയതിനുശേഷം കണ്ടക്ടറും ഡ്രൈവറും പ്രതിക്ക് ഒത്താശചെയ്ത ശേഷം ഷട്ടര് താഴ്ത്തി പുറത്തുപോയി. തുടര്ന്ന് പാലാ ഡിവൈഎസ്പി ഷാജു ജോസിന് ലഭിച്ച രഹസ്യവിവരത്തെ തുടര്ന്നു പോലീസ് ബസിനുള്ളില് നിന്നും കുട്ടിയെയും പ്രതിയേയും കണ്ടെത്തി. എബിനെയും പോലീസ് സ്റ്റാന്ഡിനുള്ളില്നിന്നും പിടികൂടി. ബസും കസ്റ്റഡിയിലെടുത്തു.
കുട്ടിയുടെ മൊഴി പ്രകാരം കേസെടുത്ത പോലീസ് കുട്ടിയെ മെഡിക്കല് പരിശോധനയ്ക്ക് വിധേയമാക്കി. തുടര്ന്ന് അഫ്സലിന്റെയും എബിന്റെയും അറസ്റ്റ് രേഖപ്പെടുത്തി. പാലാ എസ്എഎച്ച്ഒ കെ.പി. തോംസണ്ന്റെ നേതൃത്വത്തില് എസ്.ഐ. അഭിലാഷ് എം.ഡി, എഎസ്ഐമാരായ ബിജു കെ. തോമസ്, സീനിയര് സിവില് പോലീസ് ഓഫീസര് ഷെറിന് സ്റ്റീഫന്, ബീനാമ്മ, സിപി മാരായ രഞ്ജിത്ത്, ലക്ഷ്മി, രമ്യ എന്നിവര് ചേര്ന്നാണ് പ്രതകളെ പിടികൂടിയത്
