തിരുവനന്തപുരം: കെ റെയിൽ വിരുദ്ധ പ്രചാരണങ്ങള്ക്ക് വീടുകയറി മറുപടി പറയാന് സിപിഎം. ജനങ്ങളുടെ പിന്തുണ തേടി ലഘുലേഖ പുറത്തിറക്കി. എല്ലാ വീടുകളിലും കയറി ഇറങ്ങി ലഘുലേഖ വിതരണം ചെയ്യും.
കെ റെയിൽ പദ്ധതി സംസ്ഥാനത്തെ പരിസ്ഥിതി ലോല പ്രദേശങ്ങളിലൂടെ കടന്നുപോകില്ലെന്നാണ് സിപിഎമ്മിന്റെ വാദം. പദ്ധതി ബാധിക്കുന്ന 9314 കെട്ടിട ഉടമകള്ക്ക് നഷ്ടപരിഹാരവും പുനരധിവാസവും ഉറപ്പാക്കുമെന്നും പാര്ട്ടി വ്യക്തമാക്കുന്നു. സില്വര് ലൈന് സമ്പൂര്ണ ഹരിത പദ്ധതിയാണ്. കൃഷി ഭൂമിയെ ബാധിക്കില്ല. സംസ്ഥാനത്തിന്റെ സാമ്പത്തിക സ്ഥിതിയെ തകര്ക്കുമെന്ന വാദം അടിസ്ഥാന രഹിതമാണെന്ന് ലഘുലേഖയില് പറയുന്നു.
പദ്ധതിക്ക് ആവശ്യമായ തുക വായ്പയിലൂടെ കണ്ടെത്താനാണ് ശ്രമം. 63,941 കോടി രൂപയാണ് ചെലവ് പ്രതീക്ഷിക്കുന്നത്. മൂലധന ചെലവുകൾക്ക് കടമെടുക്കാതെ മുന്നോട്ട് പോകാനാവില്ലെന്നും ലഘുലേഖയിൽ പറയുന്നു. വികസന പദ്ധതികളെ അട്ടിമറിക്കാന് യു ഡി എഫ്- ബി ജെ പി- ജമാഅത്തെ കൂട്ടുകെട്ടുണ്ടെന്നും സിപിഎം ആരോപിക്കുന്നു.
പദ്ധതിയുമായി ബന്ധപ്പെട്ട് ഇടതുമുന്നണിയിൽ തന്നെ ആശയക്കുഴപ്പം നില നിൽക്കുന്ന സാഹചര്യത്തിൽ കൂടിയാണ് ഇതിനെ രാഷ്ട്രീയമായി നേരിടാൻ സിപിഎം രംഗത്തെത്തിയിരിക്കുന്നത്.
