വിയാ റയല്‍: ചാമ്പ്യന്‍സ് ലീഗ് ഗ്രൂപ്പ് എഫിലെ നിര്‍ണായക മത്സരത്തില്‍ സൂപ്പര്‍ സ്റ്റാര്‍ ക്രിസ്റ്റിയാനോ റൊണാള്‍ഡോയുടെ മാഞ്ചസ്റ്റര്‍ യുണൈറ്റ്ഡ് നാളെ ലാ ലിഗ ടീമായ വിയാ റയലിനെ നേരിടും. ഇന്ത്യന്‍ സമയം രാത്രി 11.15 ന് കളി തുടങ്ങും. വിയാ റയലിനെ തോല്‍പ്പിച്ചാല്‍ മാഞ്ചസ്റ്റര്‍ യുണൈറ്റഡിന് ചാമ്പ്യന്‍സ് ലീഗിന്റെ നോക്കൗട്ടില്‍ കടക്കാം. ഓള്‍ഡ് ട്രാഫോര്‍ഡില്‍ നടന്ന ആദ്യ പാദത്തില്‍ യുണൈറ്റഡ് ഒന്നിനെതിരെ രണ്ട് ഗോളുകള്‍ക്ക് വിയാ റയലിനെ പരാജയപ്പെടുത്തിയിരുന്നു.
പരിശീലകന്‍ ഒലെ ഗുണ്ണര്‍ സോള്‍ഷ്യറെ പിരിച്ചുവിട്ടശേഷം മാഞ്ചസ്റ്റര്‍ യുണൈറ്റഡിന്റെ ആദ്യ മത്സരമാണിത്. ഇടക്കാല പരിശീലകനായ മുന്‍ യുണൈറ്റഡ് താരം മൈക്കിള്‍ കാരിക്കിന്റെ ശിക്ഷണത്തിലാണ് യുണൈറ്റഡ് നാളെ കളിക്കളത്തിലിറങ്ങുന്നത്. നാലു മത്സരങ്ങള്‍ വീതം കളിച്ച മാഞ്ചസ്റ്റര്‍ യുണൈറ്റഡിനും വിയാ റയലിനും ഏഴു പോയിന്റ് വീതമുണ്ട്. എന്നാല്‍ ഗോള്‍ ശരാശരിയില്‍ വിയാ റയലിനെ പിന്തള്ളി യുണൈറ്റഡ് ഒന്നാം സ്ഥാനത്ത്് തുടരുകയാണ്.
ഉക്രെയ്‌നിലെ കീവില്‍ നടക്കുന്ന ഗ്രൂപ്പ് ഇ മത്സരത്തില്‍ ബയേണ്‍ മ്യൂണിക്ക്് നാളെ ഡൈനാമോ കീവിനെ നേരിടും. കളിച്ച നാലു മത്സരങ്ങളിലും വിജയിച്ച ബയേണ്‍ 12 പോയിന്റുമായി ഒന്നാം സ്ഥാനത്താണ്. അതേസമയം, നാലു മത്സരങ്ങളില്‍ ഒരു പോയിന്റുള്ള ഡൈനാമോ കീവ് ഏറ്റവും പിന്നിലാണ്. അവസാന മത്സരത്തില്‍ ബെന്‍ഫിക്കയെ 5-2 ന്് തോല്‍പ്പിച്ച ബയേണ്‍ നോക്കൗട്ടില്‍ സ്ഥാനമുറപ്പിച്ചുകഴിഞ്ഞു.
ഗ്രൂപ്പ് ഇ യിലെ മറ്റൊരു മത്സരത്തില്‍ ബാഴ്‌സലോണ ബെന്‍ഫിക്കയെ നേരിടും. ഇന്ത്യന്‍ സമയം രാത്രി 1.30 ന് കളി തുടങ്ങും. ഗ്രൂപ്പ് എച്ചില്‍ യുവന്റസ് ചെല്‍സിയുമായി മാറ്റുരയ്്ക്കും.
