കൊച്ചി: ദുല്ഖര് സല്മാന് നായകനാകുന്ന ‘കുറുപ്പ്’ സിനിമയുടെ നിര്മാതാക്കള്ക്ക് ഹൈക്കോടതിയുടെ നോട്ടിസ്. സിനിമ പ്രദര്ശിപ്പിക്കുന്നതിനെതിരായ പൊതുതാത്പര്യ ഹര്ജിയിലാണ് കോടതി നടപടി. സിനിമയുടെ റിലീസ് നാളെയാണ് പ്രഖ്യാപിച്ചിരിക്കുന്നത്.
ക്രിമിനല് കുറ്റവാളിയായ സുകുമാരക്കുറിപ്പിന്റെ സ്വകാര്യത ലംഘിക്കപ്പെടുമെന്നു പറഞ്ഞ് സെബിന് തോമസ് എന്ന വ്യക്തിയാണ് ഹൈക്കോടതിയില് ഹര്ജി നല്കിയത്. നിര്മാതാക്കള്, ഇന്റര്പോള്, കേന്ദ്ര സംസ്ഥാന സര്ക്കാരുകള് എന്നിവര്ക്കും ഹൈക്കോടതി നോട്ടിസ് അയച്ചിട്ടുണ്ട്. കുപ്രസിദ്ധ ക്രിമിനല് സുകുമാരക്കുറുപ്പിന്റെ കഥ പറയുന്ന ചിത്രമാണ് ദുല്ഖര് നായകനാകുന്ന കുറുപ്പ്. ശ്രീനാഥ് രാജേന്ദ്രനാണ് സംവിധാനം. മലയാളം, തമിഴ്, തെലുങ്ക്, ഹിന്ദി, കന്നഡ എന്നീ അഞ്ച് ഭാഷകളിലാണ് ചിത്രം തിയറ്ററുകളില് എത്തുന്നത്.
ദുല്ഖര് സല്മാന് സുകുമാരക്കുറുപ്പിന്റെ വേഷത്തിലെത്തുന്ന ‘കുറുപ്പ്’ സിനിമ 12ന് കേരളത്തിലെ തിയേറ്ററുകളിലും മള്ട്ടിപ്ലെക്സുകളിലുമായി 450 സ്ക്രീനുകളിലാണ് റിലീസ് ചെയ്യുന്നത്. നേരത്തെ ഒടിടി റിലീസിന് കരാറുണ്ടാക്കിയ ചിത്രം പിന്നീട് മമ്മൂട്ടിയുടെ നിര്ദേശപ്രകാരം തിയേറ്റര് റിലീസിന് തീരുമാനിക്കുകയായിരുന്നു.
ദുല്ഖര് സല്മാന്റെ ഏറ്റവും ചെലവേറിയ സിനിമയായ കുറുപ്പ് ഇന്നത്തെ സാഹചര്യത്തില് തിയേറ്റര് റിലീസ് ചെയ്യുന്നതില് വലിയ റിസ്കുണ്ടെങ്കിലും പ്രേക്ഷകരില് പ്രതീക്ഷയര്പ്പിച്ചാണ് ആ റിസ്ക് ഏറ്റെടുത്തിരിക്കുന്നതെന്ന് നിര്മാതാവ് കൂടിയായ ദുല്ഖര് സല്മാനും നിര്മാണ പങ്കാളിയായ എം. സ്റ്റാര് എന്റര്ടെയ്ന്മെന്റിന്റെ സാരഥി അനീഷ് മോഹനും വാര്ത്താസമ്മേളനത്തില് പറഞ്ഞു. കുറുപ്പിന് തിയേറ്ററുകള് രണ്ടാഴ്ച ഫ്രീ റണ് ഉറപ്പു നല്കിയിട്ടുണ്ടെന്ന് തിയേറ്റര് ഉടമകളുടെ സംഘടനയായ ഫിയോക്ക് പ്രസിഡന്റ് വിജയകുമാര് വ്യക്തമാക്കിയിരുന്നു.
