തിരുവനന്തപുരം : സംസ്ഥാനത്ത് ചില സ്ഥലങ്ങളില് ഇടിമിന്നലോട് കൂടിയ ശക്തമായ മഴയ്ക്കും കാറ്റിനും സാധ്യതയുണ്ടെന്ന് മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രം. ഇന്ന് പത്ത് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിലാണ് യെല്ലോ അലര്ട്ടുള്ളത്. ഉച്ചയ്ക്ക് ശേഷം ശക്തമായ മഴയായിരിക്കുമെന്നാണ് നിര്ദ്ദേശം.
മത്സ്യതൊഴിലാളികള് ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രം നിര്ദ്ദേശം നല്കി. ശനിയാഴ്ച വരെ മത്സ്യതൊഴിലാളികള് കടലില് പോകരുത്. അറബിക്കടലില് ലക്ഷദ്വീപിന് മുകളിലായി സ്ഥിതി ചെയ്യുന്ന ന്യൂനമര്ദ്ദത്തിന്റെ സ്വാധീനത്താലാണ് കേരളത്തില് മഴ കിട്ടുന്നത്. എന്നാല് കഴിഞ്ഞ ദിവസം ആറ് ജില്ലകളില് പ്രഖ്യാപിച്ചിരുന്ന ഓറഞ്ച് അലര്ട്ടുകള് പിന്വലിച്ചിട്ടുണ്ട്.
ന്യൂനമര്ദ്ദം അടുത്ത ദിവസങ്ങളില് വടക്ക് പടിഞ്ഞാറന് ദിശയില് സഞ്ചരിച്ച് കൂടുതല് ശക്തി പ്രാപിക്കുമെങ്കിലും കേരളത്തെ കാര്യമായി ബാധിക്കാനിടയില്ലെന്നാണ് വിലയിരുത്തല്. ഇതിനിടെ മുല്ലപ്പെരിയാര് അണക്കെട്ടിലെ ജലനിരപ്പ് 138.70 അടിയായി ഉയര്ന്നിട്ടുണ്ട്. തമിഴ് നാട്ടില് നിന്നുള്ള അഞ്ച് മന്ത്രിമാര് ഇന്ന് മുല്ലപ്പെരിയാര് അണക്കെട്ട് സന്ദര്ശിക്കും. സ്പില്വേ ഷട്ടറുകള് തുറന്ന സാഹചര്യം വിലയിരുത്താനാണ് സന്ദര്ശനം.
