തിരുവനന്തപുരം : ശക്തമായ മഴയെ തുടര്ന്ന് സംസ്ഥാനത്ത് നടക്കാനിരിക്കുന്ന പ്ലസ് വണ് പരീക്ഷ മാറ്റിവെച്ചു. ഒക്ടോബര് 18 തിങ്കളാഴ്ച നടക്കാനിരുന്ന പരീക്ഷയാണ് മാറ്റിവെച്ചിരിക്കുന്നത്. പ്രതികൂല സാഹചര്യത്തില് വിദ്യാര്ത്ഥികള്ക്ക് പരീക്ഷാ കേന്ദ്രത്തിലേക്ക് എത്തിച്ചേരാന് ബുദ്ധിമുട്ടാകുമെന്നത് കണക്കാക്കിയാണ് പരീക്ഷ മാറ്റിവെയ്ക്കുന്നത്.
പുതുക്കിയ തിയതി പിന്നീട് അറിയിക്കുമെന്ന് വിദ്യാഭ്യാസ വകുപ്പ് മന്ത്രി വി. ശിവന്കുട്ടി അറിയിച്ചു. ഔദ്യോഗിക ഫേസ്ബുക്ക് പോസ്റ്റിലൂടെയാണ് മന്ത്രി ഇക്കാര്യം അറിയിച്ചിരിക്കുന്നത്.
അതേസമയം സംസ്ഥാനത്ത് കഴിഞ്ഞ ദിവസത്തെ അപേക്ഷിച്ച് കുറഞ്ഞെങ്കിലും മഴ തുടരുകയാണ്. പത്തനംതിട്ട ജില്ലയിലും പമ്പാ ത്രിവേണിയിലും മഴ നാശം വിതച്ച സാഹചര്യത്തില് ശബരിമലയില് ഭക്തര്ക്ക് പ്രവേശനം ഉണ്ടായിരിക്കില്ലെന്ന തിരുവിതാംകൂര് ദേവസ്വം ബോര്ഡ് അറിയിച്ചിട്ടുണ്ട്.
