ഇടുക്കി: ഇടുക്കി അണക്കെട്ടിലെ ജലനിരപ്പ് ഉയരുന്ന പശ്ചാത്തലത്തില് ബ്ലൂ അലര്ട്ട് പ്രഖ്യാപിച്ചു. ജലനിരപ്പ് സംഭരണ പരിധിയോട് അടുക്കുന്ന പശ്ചാത്തലത്തിലാണ് നടപടി. നിലവില് 2390.86 അടിയാണ് ജലനിരപ്പ്. പരമാവധി സംഭരണപരിധി 2403 അടിയാണ്.
ബ്ലൂ അലര്ട്ട് പ്രഖ്യാപിച്ചിട്ടുണ്ടെങ്കിലും ആശങ്ക വേണ്ടെന്ന് കെഎസ്ഇബി അധികൃതര് വ്യക്തമാക്കി. അണക്കെട്ടിലെ ജലനിരപ്പ് 2396 അടിയായാല് മാത്രമാണ് ഓറഞ്ച് അലേര്ട്ട് പ്രഖ്യാപിക്കുക. റെഡ് അലേര്ട്ട് പ്രഖ്യാപിക്കണമെങ്കില് ജലനിരപ്പ് 2397 അടിയാകണം.
പരമാവധി സംഭരണ പരിധിയായ 2403 അടിയില് ജലനിരപ്പ് എത്തിയാല് മാത്രമേ ഷട്ടറുകള് തുറക്കുകയുള്ളു. ഇതിന് 36 മണിക്കൂര് മുന്പെങ്കിലും ബ്ലൂ അലേര്ട്ട് പ്രഖ്യാപിക്കണമെന്നാണ് കേന്ദ്ര ജല കമ്മിഷന് നിര്ദ്ദേശം. അതേത്തുടര്ന്നുള്ള മുന്കരുതല് നടപടിയുടെ ഭാഗമായിട്ടാണ് ഇപ്പോഴത്തെ ജാഗ്രതാ നിര്ദ്ദേശം.
