കോഴിക്കോട്: ഗുരുവിനെ സമാദരിച്ച് സ്മൃതി മണ്ഡപം ഒരുക്കി ശിഷ്യന്. ഭാരതീയ നാട്യ പരമ്പരയിലെ സമകാലീന ദീപസ്തംഭങ്ങളില് അഗ്രേസരനായ ഗുരു ചേമഞ്ചേരി കുഞ്ഞിരാമന് നായരുടെ സ്മരണാര്ത്ഥം ശിഷ്യനായ ഡോ.മധുസൂദനന് ഭരതാഞ്ജലിയാണ് കൊയിലാണ്ടിയില് മുനിസിപ്പല് ഓഫീസിനടുത്ത് ഗുരു സ്മൃതി മണ്ഡപം ഒരുക്കിയത്.
തലമുറകളിലേക്ക് നാട്യശാസ്ത്രത്തെ എത്തിക്കാന് സ്വജീവിതം സമര്പ്പിച്ച ഗുരുനാഥനോടുള്ള ആദരവിനൊപ്പം പുതുതലമുറക്കത് അന്യംനിന്നു പോകരുതെന്ന ആഗ്രഹത്താലുമാണ് മണ്ഡപമെന്ന് ഡോ. മധുസൂദനന് ഭരതാഞ്ജലി പറഞ്ഞു. മുഴുവന് സമയവും നൃത്തവും സംഗീതവും തുടിക്കുന്ന ഇവിടുത്തെ അന്തരീക്ഷത്തില് ഏത് കലാകാരനും തന്റെ കഴിവ് പ്രദര്ശിപ്പിക്കുന്നതിനുള്ള അവസരമുണ്ടാകും.
ഒക്ടോബര് 11 ന് വൈകീട്ട് ആറിന് ചിദാനന്ദപുരി സ്വാമി ഭദ്രദീപം കൊളുത്തി അനുഗൃഹ പ്രഭാഷണം നടത്തി ഗുരു സ്മൃതി മണ്ഡപത്തിന്റെ പ്രവര്ത്തനത്തിന് തുടക്കം കുറിയ്ക്കും. കെ. മുരളീധരന് എം.പി ഉദ്ഘാടനം നിര്വ്വഹിക്കും. സിനിമാ സംവിധായകന് അലി അക്ബര് ഫോട്ടോ അനാച്ഛാദനം ചെയ്യും. പിന്നണി ഗായകന് വി.ടി മുരളി മുഖ്യാതിഥി ആയിരിക്കും. തുടര്ന്ന് നൃത്താര്ച്ചനയും ഉണ്ടായിരിക്കും.
