ഷാര്ജ: ഐപിഎല്ലില് ഇന്നലെ നടന്ന ആദ്യ കളിയില് ദല്ഹി ക്യാപ്പിറ്റല്സിനെ പരാജയപ്പെടുത്തി കൊല്ക്കത്ത നൈറ്റ് റൈഡേഴ്സ്. മൂന്ന് വിക്കറ്റിന്റെ വിജയമാണ് അവര് നേടിയത്. ജയത്തോടെ 11 കളികളില് നിന്ന് 10 പോയിന്റുമായി പ്ലേഓഫ് സാധ്യതകളും അവര് സജീവമാക്കി. ആദ്യം ബാറ്റ് ചെയ്ത് ദല്ഹി ഉയര്ത്തിയ 128 റണ്സിന്റെ വിജയലക്ഷ്യം 10 പന്തുകളും മൂന്ന് വിക്കറ്റും ബാക്കിനില്ക്കേ 130 റണ്സെടുത്ത് കൊല്ക്കത്ത മറികടന്നു.
മികച്ച ബാറ്റിങ് പുറത്തെടുത്ത നിതീഷ് റാണയും (36 നോട്ടൗട്ട്), ഓപ്പണര് ശുഭ്മാന് ഗില്ലും (30), സുനില് നരെയ്നുമാണ് (21) കൊല്ക്കത്തയ്ക്ക് ജയം സമ്മാനിച്ചത്. ദല്ഹിയെ ചെറിയ സ്കോറിന് ചുരുക്കിയ ബൗളര്മാരും കൊല്ക്കത്തയുടെ വിജയത്തില് നിര്ണായക പങ്കുവഹിച്ചു. ദല്ഹിക്ക് വേണ്ടി ആവേശ്ഖാന് മൂന്ന് വിക്കറ്റ് വീഴ്ത്തിയപ്പോള് കഗിസോ റബാദ, അശ്വിന്, ലളിത് യാദവ് എന്നിവര് ഓരോ വിക്കറ്റ് വീതം സ്വന്തമാക്കി. സ്കോര്: ദല്ഹി നിശ്ചിത ഓവറില് ഒന്പതിന് 127. കൊല്ക്കത്ത 18.2 ഓവറില് ഏഴിന് 130.
ആദ്യം ബാറ്റ് ചെയ്ത ദല്ഹി നിശ്ചിത ഓവറില് ഒന്പത് വിക്കറ്റ് നഷ്ടത്തില് 127 റണ്സെടുത്തു. തകര്പ്പന് പ്രകടനം കാഴ്ചവെച്ച കൊല്ക്കത്ത ബൗളര്മാരാണ് ദല്ഹിയെ ചെറിയ സ്കോറില് തളച്ചത്. ദല്ഹിക്ക് വേണ്ടി 39 റണ്സ് വീതമെടുത്ത സ്റ്റീവന് സ്മിത്തും ഋഷഭ് പന്തും മാത്രമാണ് ഭേദപ്പെട്ട പ്രകടനം പുറത്തെടുത്തത്. ധവാന് 24 റണ്സും നേടി. മറ്റൊരാള് പോലും ദല്ഹി ഇന്നിങ്സില് രണ്ടക്കം കണ്ടതുമില്ല. ദല്ഹി ഇന്നിങ്സില് ഒരു സിക്സ് പോലും പിറന്നില്ല.
കൃത്യമായ ഇടവേളകളില് വിക്കറ്റ് വീഴ്ത്തിക്കൊണ്ട് കൊല്ക്കത്ത ബൗളര്മാര് ദല്ഹി ബാറ്റിങ് നിരയെ തകര്ത്തു. മലയാളി താരം സന്ദീപ് വാര്യര് കൊല്ക്കത്ത ടീമിലിടം നേടി. കൊല്ക്കത്തയ്ക്ക് വേണ്ടി ലോക്കി ഫെര്ഗൂസന്, സുനില് നരെയ്ന്, വെങ്കടേഷ് അയ്യര് എന്നിവര് രണ്ടും സൗത്തി ഒരു വിക്കറ്റ് നേടി.
ജന്മഭൂമി ഓണ്ലൈന്