ലണ്ടന്: ലിവര്പൂളിനായി സെഞ്ച്വറി അടിച്ച് മുന്നേറ്റ താരം സാദിയോ മാനെ. പ്രീമിയര് ലീഗില് ക്രിസ്റ്റല് പാലസിനെതിരായ മത്സരത്തിലാണ് മാനെ ലിവര്പൂളിനായി നൂറാം ഗോള് നേടിയത്. മത്സരത്തില് ലിവര്പൂള് മടക്കമില്ലാത്ത മൂന്ന് ഗോളുകള്ക്ക് വിജയം നേടി.
നാല്പ്പത്തിമൂന്നാം മിനിറ്റിലാണ് സാദിയോ മാനെ സ്കോര് ചെയ്തത്. ഇതോടെ പ്രീമിയര് ലീഗില് ഒരു ടീമിനെതിരെ തുടര്ച്ചയായി ഏറ്റവും കൂടുതല് ഗോള് അടിക്കുന്ന താരമെന്ന റിക്കാര്ഡ് മാനെക്ക് സ്വന്തമായി. ക്രിസ്റ്റല് പാലസിനെതിരെ സാദിയോ മാനെയുടെ തുടര്ച്ചയായി ഒമ്പതാം ഗോളാണിത്. മുഹമ്മദ് സല, നബി കീറ്റ എന്നിവരും ഓരോ ഗോള് നേടി. ഈ വിജയത്തോടെ ലിവര്പൂള് അഞ്ചു മത്സരങ്ങളില് പതിമൂന്ന് പോയിന്റുമായി ഒന്നാം സ്ഥാനത്തെത്തി.
മറ്റൊരു മത്സരത്തില് മാഞ്ചസ്റ്റര് സിറ്റിയെ സതാംപ്റ്റണ് ഗോള് രഹിത സമനിലയില് പിടിച്ചുനിര്ത്തി. അഞ്ചു മത്സരങ്ങളില് പത്ത് പോയിന്റുള്ള സിറ്റി രണ്ടാം സ്ഥാനത്താണ്. ആഴ്സണല് ഏകപക്ഷീയമായ ഒരു ഗോളിന് ബേണ്ലിയെ പരാജയപ്പെടുത്തി. മുപ്പതാം മിനിറ്റില് ഒഡേഗാര്ഡാണ് ഗോള് നേടിയത്.
