കാബൂള്: പഞ്ച്ശീര് താലിബാന് മുന്നില് ഇനിയും അടിയറവ് പറഞ്ഞിട്ടില്ലെന്ന് അഫ്ഗാനിലെ ദേശീയ പ്രതിരോധ സേനയുടെ വക്താവ്.
ദേശീയ പ്രതിരോധ സേനയുടെ നേതാക്കളായ അഹമ്മദ് മസ്സൂദും മുന് അഫ്ഗാന് വൈസ് പ്രസിഡന്റ് അംറുള്ള സാലെയും സുരക്ഷിതരാണെന്നും ദേശീയ പ്രതിരോധ സേന വക്താവ് അറിയിച്ചു. ‘ഇവര് രണ്ട് പേരും അഫ്ഗാനിസ്ഥാനിലുണ്ട്,’ ദേശീയ പ്രതിരോധ സേനയുടെ വക്താവായ അലി മൈസം നസാറി പറഞ്ഞു.
അഫ്ഗാനിസ്ഥാനിലെ 34 പ്രവിശ്യകളില് താലിബാനോട് പൊരുതി നിന്ന ഏക പ്രവിശ്യയായിരുന്നു പഞ്ച്ശീര്. ഇവിടെ അംറുള്ള സാലെയുടെയും അഹമ്മദ് മസൂദിന്റെയും നേതൃത്വത്തില് ദേശീയ പ്രതിരോധ സേന താലിബാനെതിരെ പൊരുതിവരികയായിരുന്നു. അതിനിടയിലാണ് പാകിസ്ഥാന് സേനയുടെ സഹായത്തോടെ താലിബാന് ശക്തമായി ആക്രമണം നടത്തി പഞ്ച്ശീര് പിടിച്ചതായി വാര്ത്തകളെത്തിയത്. പഞ്ച്ശീറിന്റെ തലസ്ഥാനമായ ഖസാറക്കില് താലിബാന് പ്രവേശിച്ചതായും ഖസാറക്കിനോട് ചേര്ന്നുള്ള റുഖ ജില്ലാ കേന്ദ്രവും പൊലീസ് ആസ്ഥാനവും താലിബാന് നിയന്ത്രണത്തിലായെന്നും അന്ന് വാര്ത്താ ഏജന്സികള് റിപ്പോര്ട്ട് ചെയ്തിരുന്നു. പഞ്ച്ശീര് പ്രവിശ്യ ഗവര്ണറുടെ ഔദ്യോഗിക വസതിയടക്കമുള്ള തന്ത്രപ്രധാനമേഖലകളില് താലിബാന്കാര് എത്തിയ ചിത്രങ്ങള് സമൂഹമാധ്യമങ്ങളില് എത്തിയിരുന്നു. അംറുള്ള സാലേ കൊല്ലപ്പെട്ടതായും അന്ന് വാര്ത്ത പ്രചരിച്ചിരുന്നു.അതിന് ശേഷമായിരുന്നു താലിബാന്റെ പുതിയ ഇടക്കാല സര്ക്കാര് രൂപീകരിച്ച പ്രഖ്യാപനമുണ്ടായത്.
എന്നാല് ബുധനാഴ്ചയാണ് പഞ്ച്ശീര് താലിബാന് മുന്നില് അടിയറവ് പറഞ്ഞിട്ടില്ലെന്ന പ്രഖ്യാപനം ദേശീയ പ്രതിരോധ സേനയുടെ വക്താവ് പുറത്ത് വിട്ടത്. ‘അംറുള്ള സാലയെും അഹമ്മദ് മസൂദും അഫ്ഗാനിസ്ഥാനില് തന്നെയുണ്ട്. അവര് ഒരിക്കലും അഫ്ഗാനിലെ ജനങ്ങളെ കൈവിടില്ല. അഫ്ഗാനിലെ ജനങ്ങള് ഉയര്ന്ന് വരും. അവര് ഇപ്പോള് കാബൂളിലുള്ള തീവ്രവാദികളെ നേരിടും,’ അലി മെയ്സി നസാറി പറഞ്ഞു.
