കൊല്ലം : വിസ്മയ കേസില് ഈമാസം പത്തിന് തന്നെ പോലീസ് കുറ്റപത്രം സമര്പ്പിക്കും. വിസ്മയ മരിച്ച് 90 ദിവസം പിന്നിടും മുമ്പാണ് ഇപ്പോള് കുറ്റപത്രം സമര്പ്പിക്കാന് ഒരുങ്ങുന്നത്. വിസ്മയയുടെ ഭര്ത്താവും പ്രതിയുമായ കിരണ് കുമാര് കേസിന്റെ വിചാരണ കഴിയുന്നത് വരെ ജാമ്യം നേടി പുറത്തിറങ്ങുന്നത് ഒഴിവാക്കുന്നതിനാണ് ഇത്.
നാല്പ്പതിലേറെ സാക്ഷികളും ഇരുപതിലേറെ തൊണ്ടിമുതലുകളുമാണ് കേസിനായി ഹാജരാക്കുന്നത്. ഡിജിറ്റല് തെളിവുകളിലൂന്നിയാണ് പോലീസ് അന്തിമ കുറ്റപത്രം തയാറാക്കുന്നത്. വിസ്മയ സുഹൃത്തുക്കള്ക്കും ബന്ധുകള്ക്കും അയച്ച വാട്ട്സ് ആപ്പ് സന്ദേശങ്ങള് തന്നെയാണ് കുറ്റപത്രത്തില് കിരണിന് എതിരായ മുഖ്യ തെളിവ്.
വിസ്മയയുടെ മൃതശരീരം പോസ്റ്റ്മോര്ട്ടം ചെയ്ത ഡോക്ടര്മാര്, ഫോറന്സിക് വിദഗ്ദര്, വിസ്മയയുടെ സുഹൃത്തുകള്, ബന്ധുക്കള് എന്നിവരടങ്ങുന്നതാണ് സാക്ഷിപട്ടിക. മോബൈല്ഫോണുകള് ഉള്പ്പടെ 20 തൊണ്ടിമുതലുകളും അന്വേഷണ സംഘം കോടതിയില് ഹാജരാക്കും. കൂടാതെ വിസ്മയ കടുത്ത മാനസ്സിക പീഡനത്തിന് ഇരയായിരുന്നു എന്നതിനുള്ള സാഹചര്യത്തെളിവുകളും പോലീസ് ശേഖരിച്ചിട്ടുണ്ട്.
സ്ത്രീധന പീഡനവും, ഗാര്ഹിക പീഡനവും ഉള്പ്പടെ ഏഴ് വകുപ്പുകളാണ് കുറ്റപത്രത്തില് ഉള്പ്പെടുത്തിയിരിക്കുന്നത്. നിലവില് വിസ്മയയുടെ ഭര്ത്താവ് കിരണ്കുമാര് മാത്രമാണ് കേസില് പ്രതിയായി ഉള്ളത്. വിസ്മയയുടെ കുടുംബം കിരണിന്റെ ബന്ധുക്കള്ക്കെതിരേയും ആരോപണം ഉയര്ത്തിയിരുന്നെങ്കിലും കേസില് മറ്റാരേയും നിലവില് പ്രതിചേര്ക്കേണ്ടതില്ലെന്നാണ് പോലീസ് തീരുമാനം.
